Sema Çaglak

 

AMED - 7ê hezîrane de bi sloganê, "Ziwanê Kurdkî bibo ziwanê fermî û pê perwerde bêro dayene” Amed de  mîtîngêk yeno organîzekerdene. Sekretera Şubeyê Hûmara 1î ya Egîtîm Senî ya Amedî Hatîce Efe, dîyar kerd ke perwerdeyê bi ziwanê dayîke heqêkê bingehîn o û vat: "Mesela welatê bînan de zafziwanî esto hetê fermî de. Zafziwanî zaf rengînî yo, zaf kulturî yo. Zirarê zafziwanî zî nêreseno tu kesêk rê."

 

Kampanya ke Komîsyonê 21ê Sibate ya Platformê Ziwanê Kurdkî û Torra Ziwan û Kulturê Kurdkî yeno organîzekerdene, bi waştişê “Ziwanê kurdkî bibo ziwanê fermî û pê perwerde bêro dayene” 22yê sibate de dabî destpêkerdene, dewam keno. Çarçewaya xebatanê kampanyaya do Cizîr, Wan û Amedî de 'Mîtîngê Ziwanê Kurdkî' bêrê organîzekerdene. 7ê hezîrane de Amed de mîtîng yeno organîzekerdene. Derheqê babete de Sekretera Şubeyê Hûmara 1î ya Egîtîm Senê ya Amedî Hatîce Efe ajansê ma rê qisey kerd.  

 

Hatîce, destpêkê qiseykerdişê xo de bale ant serê ziwanî û vat: "Ziwan têkilîyê mîyanê komelî de yo. Gama ke tûtî ameyî dinya, tewr verê dayîke xo dir têkilî danê ro. Coka ziwanê dayîke semedê dewamîyê netewêkê madeyê tewr bingehîn o. Serê girîngîyê ziwanî de xeylêk sebeb merdim eşkeno rêze bikero. Lê êdî lazim nêyo ke ma girîngîyê ziwanî bîyarê serê ziwanî. Na çarçewa de xeylêk xebatî zî yenê kerdene. Sewbîna xebatê zanîstî zî yenê kerdene. Semedê ziwan eynî wextî de xebatêke zanistî yo. Semedê nê sebeban ma sey pêameyîşê torre, xebatêke wina ma da vernîya xo. Semedo ke êdî tehlukeyê serê ziwanê xo her tewir ramojneno. Sewbîna rastê xeylêk tewir tedayan yeno. Eke ziwan nêbo ziwanêk perwerdeyî, mîyanê komelî de nêro qiseykerdene û sazgeh û  dezgehan de ca nêgîro do o ziwan bimiro. Ganî ziwanê kurdkî bibo ziwanê fermî."

 

'Ma wazenê bi kurdkî perwerde bidê'

 

Hatîce dîyar kerd ke mîtîngê ziwanê kurdkî semedê waştişê heqê perwerdehî û pawitişê ziwanê kurdkî yo û vat: "Coka ma sey şarê Kurdî û sazgehê şubeyê Egîtim Senî wazenê ke ziwanê kurdkî bibo ziwanê fermî. Ma heqê ziwanê dayîke pawenê û ma wazenê wendekaranê xo bi ziwanê dayîke ser perwerde bikerê. Mîtîngê semedê ziwanî ke do 7ê menge de Amed de bêro organîzekerdene, Torra Kultur û Ziwanê kurdkî semedê destûrî muracat kerdo. Eke bibo, ma do semedê waştişê heqê ziwanê dayîke beşdar bibê. Ma hêvî kenê ke wayîr vejîyê û tewrbîyayîşo tewr xurt bêro kerdene."

 

'Semedê kampanyaya îmzayan tewrbîyayîşêk xurt lazim o'

 

Hatîce tewr peyîn wina vat: "No mîtîng semedê waştişê heqê ziwanî xeylêk girîng o. Sewîyeya hişmendî hetê ziwanî ra tewr xurt o. Semedo ke heme sazgehî semedê ziwanî ameyê têhet. No zî hêvî û bawerîyêk pîl dano. Semedê êdî hayeyê heme kesan tehlukeyê serê ziwanî de esto. Hem kirdasî û hem zî kirdkî. Ma her çiqas girîngî bidê serê ziwanî zî çi heyf mîyanê wareyê cuye de kêm yeno xebitnayene. Semedê wayîrvejîyayîşê kampanyaya imza zî na xebate zaf girîng a."