MERKEZÊ XEBERAN - Goreyê raporê KCDPyî menga gulane de 17 cinîyî ameyî qetilkerdene, 20 cinîyî zî bi hawayêkê şikdarî merdî.

 

Platformê 'Ma do Verê Kişîyayîşê Cinîyan Bigêrê' (KCDP) bîlançoya şîdetê camêrdan a gulane pare kerde. Goreyê raporî  menga gulane de 17 cinîyî ameyî qetilkerdene, 20 cinîyî zî bi hawayêkê şikdarî merdî. 17 cinîyan ra sebebê qetilkerdişê 10 cinîyan nêzanîyenê. 7 cinîyê bînî zî semedo ke waştêne cuya xo ser o bire bidê ameyî qetilkerdene. 2 cinîyî hetê lajê xo ra, yew cinîye hetê babîyê xo ra, 7 cinîyê hetê merdêyanê xo ra, 3 cinîyî hetê mêrdeyanê xo yê verênan ra, yew cinîye zî hetê waştîyê xo yê verênî ra kişîyayî. 10 cinîyî keyeyê xo de, 2 cinîyî werteyê kuçeyî de, yew cinîye erazî de, 1 cinîye cayêkê koyî de ameyî qetilkerdene la nêame tesbîtkerdene ke 3 cinîyê bînî kamca de kişîyayî.

 

'Eke faîlî nêrê cezakerdene do şîdet dewam bikero'

 

KCDPyî eşkera kerd ke heta ke sebeb û faîlî nêrê eşkerakerdene, verguman û kiştoxî nêrê cezakerdene, tedbîrî nêrê girewtene, muhakemeya edîle nêra kerdene kişîyayîşê cinîyan do dewam bikerê.