Sema Çaglak - Şehrîban Aslan

 

AMED - Omer Sîpek 12 serrî yo tepişte yo, dayîka ci Saadet Sîpek, bale ant serê rewşa lajê xo û vat: "Merdim nêeşkeno Tirkîya de qalê edalet û huqûqî bikero. La ganî şar zî wayîrê tepişteyanê xo vejîyo. Wextê tecrîd bêro peynîkerdene, do pêro tepişteyî zî azad bibê." 

 

Çalakîya grevê vêşanîye hemverê tecrîdê serê Rayberê PKKyî Abdullah Ocalanî û binpaykerdişê heqê tepişteyan ke 27ê teşrîna peyêne 2020 de zîndanê Tirkîya û herême de amebî destpêkerdene 189 rojî yo dewam kena. Keyeyê tepişteyan reaksîyon vera nîşanê rewşa bêvengbîyayîşî dayî û vengdayîşê wayîrvejîyayîşê çalakîya grevê vêşanîye kerdî. Omer Sîpek ke 12 serrî yo tepişte yo û nika Zîndanê Ereglî yê Konya de yo. Dayîka ci Saadet Sîpek derheqê rewşa lajê xo de ajansê ma rê qisey kerd.

 

Saadete, bale ant serê tepişteyî lajê xo û vat: "Lajê mi Lîseyê Gaffar Okanî de dersa folklorî dayîne tûtan. Polîsan serê sibayî eştî serê keyeyî û ey tepişnayî. Kitabê ke qedxe nîyê heme kerdî torbe û berdî. Polîsan mi ra vat, 'Lajê to mêmanê ma yo' la 6 serrî yo nêame keye. Lajê mi şawitî Zîndanê Amedî. "

 

'Serra 55 bedenê lajê mi veşayo'

 

Saadete dîyar kerd ke lajê ci serra xo ya hîrêne de adir eşto bedenê xo û vat: "Xeylêk teda û zulm serê tepişteyan de kenê. Serra 55 bedenê lajê mi veşayo. Ez şîya nêweşxane nêverdayî ez lajê xo bivîna. Xora lajê mi nêweşxane de kelepçekerde bi. Çîyêk destê ma ra nêameyîne ke reyna zî neêverdayî lajê xo bivîna. Lajê mi a rewşe de verdayî, kezeba mi veşa. Dimayê 6 serran serbest ame veradayene û verê xo da Çorûm. Dimayê serrêke reyke bîn ame tepiştene. Çorûm ra ey surgunê Zîndanê Ereglî yê Konya kerdî. Bi 6 serrî yo tepişte yo û temamî 12 serrî yo tepişte yo."

 

'Semedê fikrê xo serrêke û nîm hucreyê yewkesî de maneno'

 

Saadete dewam de bale ant serê şert û mercê zîndanan û vat: "Zîndanê Konya de fikrê lajê mi pers kenê, o zî  fikrê xo vano û semedo ke fikrê xo vat, ey kerdî hucreyê yewkesî. Nê prosesî de embazanê xo ra dûr bi. Sewbîna rojname nêdayî ci. Gama ke ma bi telefon qisey kerd, ziwanê ci nêgêrayîne. Mi pers kerdêne çira wina bîyo. Dima ra ez musaya ke ey kerdê hucre. Uca de qiseykerdiş xo vîr ra kerdibi.  Semedê hucre qij bîya, hetê rayrayîş de zehmetî anto û coka kramp kewtêne lingê ci."

 

'Merdim nêeşkeno qalê edalet û huqûq bikero' 

 

Saadete tewr peyîn wina vat: "Lajê mi nêweş o û pêwa nêweşîya xo tewrê çalakîya grevê vêşanîye bi. Semedê pandemî demêk derg o ez nêşîya pêvînayîşê ci. Kezeba ma veşa, wa ê dayîkê bînan nêveşa. Wa wayîrê çalakîya tepişteyan vejîyê. Wa tecrîd wirzo û pêro tepişteyî azad bibê. Yê tecawizkar û tîryakîyan serbest vera danê, la kesê ke semedê fikrê xo ameyê tepiştene serbest vera nêdayî. Rewşêke winasî de merdim nêeşkeno qalê edalet û huqûqî bikero. Ganî ma paştdayîş bidê çalakîya tepişteyan."