ŞIRNEX - Bi rayberîya Komîsyonê 15ê Gulane ya Torra Kultur û Ziwan, semedê ziwanê kurdkî bibo ziwanê fermî û perwerdeyî siba do Cizîr de mîtîng organîze bikero. Endama Komîteyê Amadekarî ya Mîtîngî û Hemsereka HDPyî ya Cizîrî Guler Tunç, vengdayîşê tewrbîyayîşê mîtîngî kerd.

 

Komîsyonê 15ê Gulane ya Torra Kultur û Ziwan, semedê ziwanê kurdkî bibo ziwanê fermî û perwerdeyî 3yê hezîrane de yanî siba qezaya Cizîrî ya Şirnexî de bi sloganê, "Wa kurdkî biba ziwanê fermî ya Tirkîye" û "Wa seserra 21ine biba seserra kurdkî" mîtîngê ziwanê kurdkî organîze keno. Mîtîng do Parkê Birca Belek mabêne 16.00-20.00’an de bro kerdene.

 

Hemsereka Pêroyî ya Partîya Herêma Demokratîk (DBP) Salîha Aydenîz û Vervatoxa Platformê Ziwanê Kurdkî Şerefxan Cizîrî do tewrê mîtîngî bibê. Sewbîna hunermend Azad Bedran, Koma Jin MA û Koma Awazê Botan zî do vejîyê serê sehne. Endama Komîteyê Amadekarî ya Mîtîngî û Hemsereka Partîya Demokratîke ya Şaran (HDP) ya Cizîrî Guler Tunç, veng da şarê Botanî ke tewrê mîtîngî bibê.

 

'Hemverê ziwanî de hêrişêk topyekûn esto'

 

Gulere, derheqê ziwanî de wina vat: "Hemverê ziwanê dayîke bi serran o polîtîkayê asîmîlasyonî kewto dewre. Bi no hawayî wazenê ziwan çin bikerê. Hemverê ziwanê nasname û îradeyê ma hêrişêk topyekûn esto. Kesê ke semedê n kurdkî qisey kenê yenê lînçkerdene, kesê ke semedê kilamanê kurdkî vanê yenê qetilkerdene. Sewbîna Mûş de Fatma Altinmakas semedê qereqole de nêeşka tirkî xo îfade bikero, îfadeyê aye nêame girewtene û no zî bi sebeb ke bêra kiştene. Mekteban de ziwanê kurdkî fermî nîyo. Ziwanê kurdkî sey dersê weçînaye yeno mojnayîş. Meclîs de parlamenterê ke bi ziwanê dayîke xo qisey kenê, sey ziwanê xerîb yanî 'X' yeno ramojnayene."

 

Gulere, bale ant serê kampanya û wina vat: "Semedê veng û manaya Kovara Hawarî pîl bikerê, ma na kampanya da destpêkerdene. Çarçewaya na kampanya de xebatê ma yê tewir bi tewir do bibê. La xebata ma ya yewin zî viraştişê mîtîngan o. Do 3 merkezan de mîtîng bêro kerdene. Bi nê mîtîngî ma do wayîrvejîyayîşê şarî yê vera ziwanê kurdkî nîşan bidê."

 

'Ma vengdayîşê tewrbîyayîşî kenê...' 

 

Gulere vat, do 3yê hezîrane de yanî siba Parkê Birca Belek de mîtîng bêro organîzekerdene û vat: "Mîtîngê ma do saete mabêne 16.00 û 20.00ine de bêro organîzekerdene. Pêro amadekarîyê ma qediyayî. Ma veng danê pêro şarê Botanî ke tewrê mîtîngî bibê. Bêrê ma pîya seserra 21ine bikerê seserra ziwanê kurdkî. Sewbîna wa ziwanê kurdkî bibo ziwanê fermî û perwerdeyî. Bêrê ma vengê xo pîya berz bikerê."