Rojda Aydin

 

AMED - Hemsereka SESî ya Şubeyê Amedî Yildiz Ok Orak, derheqê vîrusê koronayî (Covît -19) qisey kerd, bale ant serê rewşa tepişteyan û vat: "Aşînêkerdişê tepişteyan nêheqîyêk pîl o û heqê weşîye ya tepişteyan yeno binpaykerdene."

 

Pêro dinya û Tirkîye de serrêke zêdeyêr o vera vîrusê koronayî (Covîd-19) têkoşîn kenê û welat de zî rewşe her ke şina tewr xirab bena. Çarçewaya tedbîrê pandemî de tewr peyîn prosesêkê 17 rojî hetê serekkomarê AKPyî Tayyîp Erdogan ra ame destpêekrdene. Hetêk ra zî Tirkîya de aşî yena kerdene. Hemsereka Sendîkaya Karkerê Weşîye û Karûbarê Komelî  (SES) ya Şubeyê Amedî Yildiz Ok Orak, derheqê rewşa peynî yê nêweşîya korona ser o qisey kerd.

 

‘Hûmara kesê ke ameyê aşîkerdene xeylêk kêm o'

 

Yildize dîyar kerd ke destpêkê pandemîyî ra nata qedexeyê ke ameyê kerdene, nêresayê amancê xo û vat: "Nê prosesê pandemîyî de lazimîyê şarî semedê hetê dewlete ra nînê bicaardene, welatijî mecbûr ê bixebityê. Çi heyf, no qedexe qet semedê înan derbas nêbi. Wexto ke merdim ewnîyeno kesê ke tewr zêde nêweş kewenê û nêweşî vila kenê xebatkar ê.  Coka nêresa amancê xo. Ma nê hewteyê qedexeyan de pabeyîbî ke komel se ra şeştî yan zî hewtay bêro aşîkerdene. Wextê qedexeyan de heme welatê dinya serê aşî de vindertî. La çi heyf Tirkîya de hûmara aşîkerdişî zaf tay a. Eke wina derbas bibo do no pandemî xelas nêbo."

 

'Zîndanan de heqê weşîye yeno binpaykerdene'

 

Yildize, dewam de wina vat: "Tepişteyê ke zîndanan de yenê tepiştene, koma tehlukeyî de ca gênê. Sewbîna zîndanan de rewşa tepişteyan binê tehluke de ya. Pêro tepişteyî pîya manenê. Semedê aşî ganî tepişteyî koma yewin yan zî ê diyîn de ca bigirewtêne. La çi heyf hema zî nêameyê aşîkerdene. Derheqê aşîkerdişê tepişteyan de destê ma de tu hûmare çin a. Semedo ke ma nêeşkenê xo biresnê înan. Ma nêzanê ke çend tepişteyî bi vîrus kewtê û çend kes senîn ameyê dermankerdene. Zîndanan de heqê weşîye yeno binpaykerdene. Netîceyê ci zaf xirab o. Sewbîna mektebî zî estê. Vatî do mamosteyî bêrê aşîkerdene, la tay kesî ameyî aşîkerdene. Eke mektebî abê, do reyna na nêweşîye vila biba."

 

‘Qedexeyê tebervejîyayîşê peynî semedê turîzmî bi’

 

Yildize, bale ant serê qedexeyê 17 rojan ke demê peyîn de ame îlankerdene û vat: "Wa 9 mengî zî qedexe bikerê, eke hemine aşî nêbê keye roniştiş ra pandemî nêqedêno. No qedexeyê 17 rojan zî ma heme baş zanê ke semedê sektorê turîzmî ame îlankerdene. Heta menga hezîrane qedexe kerdî û hezîran ra dima wedarnayî. No qedexe semedê tûrîzmî ame îlankerdene. Semedê debarkerdişê tewr pîl yê Tirkîye, sektorê turîzmî yo. Semedê nê  rîsk nêgînê verê çiman û semedê turîstî bêrê welat muracatê nê rayîrî danê. La ma bawer nêkenê ke bibo çareserîyêk."

 

'Ma eşkenê vajê ke rojê xirabî'

 

Yildize tewr peyîn wina vat: "Rewşa ma ya tewr xirab, par menga temmuze û tebaxe de bi. Ma hewl danê ke bi îmkananê xo biewnê xo ra. Qedexeyê ke dewlete îlan kena bingehê înan çin o. Ma veng danê wezîrê weşîye ke demêk nêzdî de pêro kesî bêrê aşîkerdene. Bi taybetî zî cayê sey zîndanî, mektebê ke girseyî kom benê. Nêweşxaneyê Amedî de heta nika 100 nêweşê cayî û nêzdîyê 20 kesî zî beşê lezgîn de estê. Ma hêvî kenê ke menga temmuze û tebaxe zî sey par xirab nêbo. Ma eşkenê vajê ke rojê xirabî pabeyê ma yê. Wa kes nêvajo hawa germ a û cayê qalabilaxan de nêmano. Wa zêde tewrê veyvan û şînan nêbê. Wa şarê ma mesafeyê fizîkî û tedbîran rê baldar bo."