Medya Uren

 

MÊRDÎN - Kuçeyê tarîxî yê Mêrdînê de dikanêk kolektîf ê bi nameyê “Her kesî rê Vîrameyîşêk" beno wargehê xeylêk cinîyê ke feqîr ê. Cinîyê ke nêeşkenê debara xo bikerê bi nexşê ke viraznenê, dikan de pêşkêşê şarî kenê. Wayîrê dikanî Cerene vana: "Mi waşt tena ez ney, her kes feyde bigîro û nika ma xo resnenê xeyalê xeylêk cinîyan."

 

Cinî rayberê cuya komînal ê. Ma nê çî na roje de zî vînenê. Cerena ke beşê Mamostetîya Huqûqî qedênaya û nêameya tayînkerdene zî waşt dest bida xeylêk cinîyan û înan dir karêk awan bikera. Bi nê rengî bî wayîrê kargehêk komînal. Nameyê dikanî sey, Dikanê Dudu “Her kesî ra Vîrameyîşêk" biname kenê. Cerene dikanê xo û xeyalê cinîyan ma ra vana.

 

Cerene yew bi yew berardişê zereyê dikanî de bi ma dana naskerdene û hîkayeyê ê kesan ma ra vana.

 

Xeylêk înan ra wendekar ê û semedê debara xo bikerê, resim anê dikan. Hîn zî înan ra semedê tûtanê xo wey bikerê, hîn înan rê zî bi serebûtî xemgîn dir ameyê rî bi rî, mecbûr ê bi rengêk debara xo bikerê. La her yew zî çîyêk înan yê hempar esto. Bêîmkanî û bêkarî înan ardo têhet.

 

Ma nê hîkayeyan ra mûsenê ke her cilêk, nexş û yan zî berardişêk wateyêkê ci esto. Yo tewr girîng zî xebatê înan yê komîn ê. Kulturê xo û tarîxê xo danê ciwîyayîş.

 

'Ma do tim serê linganê xo de rast vinderê'

 

Ma sere de Cerene nas bikerê û persê dikanê ci bikerê. Aye Dêrsimî ra ya û mamostetîya huqûqî qedêna. Dimayê qedênayîşî zî nêameya tayînkerdene û kewta mîyanê xeylêk mexdûrê nêameyê tayînkerdene. Aye zî wina vat: "Ma do her tewir bieşkê serê linganê xo de vinderê" û qerarê akerdişê dikanî da.

 

'Yê ke hîkayeyê înan estê wa bêrê'

 

Êdî vindertişê serê linganê xo zî qîmê Cerene nêkeno û vana ke ganî xeylêk kesê bînan dir dest bidê yewbînan. Hêdî hêdî dikan formê xo gêno û beno dikanêk komîn yê xeyalanê Cerene de. Cerene wina vat: "Sere de ez wazena qalê nameyê ci bikerî ke wateyê ci xebatana ramojneno. 'Dudu' hem nameyê maya mi û hem zî nameyê ema min o. Keda her diyan zî serê mi de zaf esto û hîkayeyê mi zî ê yê. Coka mi vat, yê ke xeyalê înan estê wa bêrê. Bi nê rengî mi xeylêk kesî nas kerd û yê ke hîkayeyê înan bi, hîkayeyanê xo tîya pêşkêşê komelî kenê."

 

'Ma xo resnenê xeyalanê xeylêk cinîyan'

 

Cerene waşto ke xebatêk komîn awan bikera û resaya xeyalanê xo. Cerene wina vat: "Eke merdim yew kes bo, nêeşkeno la zaf kes bo her tewir bar eşkeno wedaro. Nika ez dikanê xo pare kena û keda xo tewr weşik kena. Ez xo resnena xeyal û vîrameyîşanê xo. Her vîrameyîşêkê xo bi nê cil û belgan, xelat û xişiran nexşnena. Her berardişêk manayêke ci, hîkayeyêk ci esto. Kesê ke nê bererdaşina gênê zî dest danê vîrameyîşê ê kesan."

 

'Ganî ma xo bi rêxistin bi hêz bikerê'

 

Cerene bale ant serê keda cinîyan û wina vat: "Wextê ti cinî bê, ti rastê mobîng û xeylêk tewirê şîdetê karî yena. Hişmendîyê camêrdan qaliban de teng verdeno. Coka amancê ma oyo ke ma nê qaliban ra vejîyê û azadîya xo ya ekonomîye awan bikerê. Cinî bi hêz a. Ez cîyayî nêkena mîyanê cinsan, ma wazenê têduştîyê înan ramojnê. Tehdîd û hêrişê bi taybetî nê prosesî de serê cinîyan de zî giran ê û ma pîya bibê hetkar. Ganî ma xo rêxistin bikerê û têhet bê. Encax ma bi no hawa eşkenê dêsê cinsperestî bişiknê û xo bi hêz bikerê."