RIHA - Emîne Şenyaşar cigêrayîşê xo yê edaletî 85 rojî yo dewam kena. Keyeyê  Şenyaşarî, vengdayîşê paştdayîşî kerd û vat, do heta peynî, nobeta xo ya edaletî dewam bikerê.

 

Nobeta cigêrayîşê edaletî ya Keyeyê Şenyaşarî ke 3 ferdê ci hetê Parlamenterê AKPyî Îbrahîm Halîl Yildiz ra amebî qetilkerdene, verê  Edlîyeya Rihayî de roja 85. de dewam kena. Saetê serê sibayî de Emîne Şenyaşar û lajê xo Ferît Şenyaşar ameyî verê berê Edliyeyê Rihayî û dest bi çalakîya xo kerdî.

 

Keyeyê Şenyaşarî, serê hesabê xo yê twîtterî de eşkerayî da û nê vatî: "Demêkê derg o ma semedê cewabdayîşê waştişê xo verê edlîyeyî de yê. Waştişêkê ma heqdar esto. Pêro dinya dî ke Keyeyê Yildizî (Keyeyê Îbrahîm Yildiz ê AKPyijî) Nêweşxaneyê Dewlete ya Pirsûsî de qirkerdiş kerdo. Temamê dinya vengê ma eşnawit. Serdozgerîya Komara ya Rihayî, her roje verê ma ara derbas bena, waştişê ma yê edaletî rê ker û lal a. 

 

3 merdimê ma nêweşxane de ameyî qetilkerdene la kes hetê înan ra nêameyo tepiştene! Serdozgerîya Rihayî nika bena hemparê suc î. Wa çîyo lazim bikerê, ma do zî nobeta xo ya edaletî peynî bikerê. Heta ke waştişê ma yê edaletî nêro cewabkerdene, ma tîya ra nêşinê. Ma vengdayîşê paştdayîşî hemine ra kenê."