COLEMÊRG - Hemsereka qezaya merkezî ya HDPyî ya Colemêrgî Sînem Seven dîyar kerd ke ganî tecrîd û binpaykerdişê Îmraliyî û heme zîndanan peynî bibo û vat, bi qanûnê înfazî yê neweyî dir hemverê tepişteyê sîyasîyan caardişê keyfî yenê kerdene.

 

Grevê vêşanîye ke tepişteyan bi amancê tecrîdê serê Rayberê PKKyî Abdullah Ocalanî bêro wedaritene, dabî destpêkerdene roja 186ine de dewam keno. Selahîyetdaran hema cewabêko pozîtîf nêdayo waştişê tepişteyan û eksê ci binpaykerdişî roj bi roje giran benê. 14ê Nîsana 2020ine de bi vurnayîşê qanûnê înfazî yê ame qebulkerdene, semedê îdarekerdişê zîndanan zî ercnayîşê tepişteyan amebi dayene. Heyetê îdarekerdişê zîndanan û muşahadeyê înan ke hetê îdarekerdişê zîndanan ra ameyê awankerdene, do semedê kesê ke 10 serrî yo zêdeyêr ceza înan rê ameya birnayene û kesê ke bi îdayê “rêxistine awankerdiş" de û bîyê endamê rêxistine” qerar bidê ke bêrê veradayene û derbasê zîndanê serakerde bibê.

 

'Ganî tecrîd bêro wedaritene' 

 

Hemsereka qezaya merkezî ya Colemêrgî ya HDPyî Sînem Seven dîyar kerd, tepişteyê sîyasî bi caardişê keyfî dir rî bi rî yê û 22 serrî yo Abdullah Ocalan binê tecrîdê giranî de yo. Sîneme ard ziwan ke tecrîd şexsê şarê Kurdî de yeno kerdene û vat: "Embazê ma hemverê tecrîdî bi 183 rojî yo grevê bêdem û bidor de yê. Prosesê pandemî de no tewr giran derbas beno. Semedê nêweşîya embazanê ma nîno dermankerdene û baş wey nêbenê. Ganî nê grevî peynî bibê. Semedê nê zî ganî tecrîd bêro wedaritene."

 

'Tecawizkar û mafya ci ra feyde girewt' 

 

Sîneme vat, semedê pandemî zîndanan de rewşa baş ya ceza ameye vistene, la tepişteyê sîyasî nê ra feyde nêgirewtî û vat: "Tacîzkar, mafya, dizdî û tîryakî rotoxî feyde ci ra girewtî û cezaya înan ameye fistene. Cigêrayîşê edaletî yê tepişteyê sîyasî virazya. La çi heyf, ci ra feyde nêgirewtî."

 

'Terkî mergî kerdî' 

 

Sîneme tewr peyîn vat, xeylêk tepişteyê nêweşî yê serê emrê 65î de estê û wina vat: "Xeylêk tepişteyê nêweşî estê. La rewşa başe ra feyde nêgînê. Rewşa normalî de ganî tepişteyê sîyasî zî rewşa başe ra feyde bigirewtêne. La tecawizkaran, dizdan û mafyayijan feyde girewt. Yanî tepişteyê sîyasî terkê mergî kerdî. Yewin waştişê ma oyo ke tecrîdê serê Raybertî û heme tepişteyan de peynî bibo.