Gulîstan Azak

 

DÊRSIM - Dewa Çayustu hetê dewlete ra amebî vengkerdene û veşnayene. Bi 28 serrî yo destûr nîno dayene ke newe ra bêra zergûnkerdene. Hacîme û Huseyîn Aktaş yê ke dewe de ciwîyenê û 8 serrî yo bê cereyan cuya xo dewam kenê, rewşe protesto kerdî û xo amade kenê ke do verê Walîtîyî de çalakîya roniştişî bikerê.

 

Dewa Çayustu ya girêdayê Pilûrê Dêrsimî, 1994ine de ameye vengkerdene û veşnayene. Dewijê ke semedê tedayan koçberê Xerpêtî û şaristanê bînan de bî, 2013ine de agêrayî serê herra xo. La wextê agêrayî, dîmenî vernîya înan xeylêk xemgîn kerdî. Dewe amebî wêrankerdene û tu çîyêk nêmendib. Dewijan hewl da ke dewe newe ra awan bikerê û bereqeyê qij de cuya xo dewam kerdî.

 

Awe û cereyan çin o

 

Welatijê ke hewl dayî wareyê cuya xo newe ra awan bikerê, bi problemê awe û cereyanî dir bi serran o ciwîyenê û bi serran o pabeyê çareserî yê. Welatijî bi jenerator û motorê awe lazimîyê xo peyda kenê. Sewbîna pêro muracatê welatijan zî bênetîce manenê.

 

Tarî beno her kes agêreno keyeyê xo

 

Dewe de 8 keyeyî estê û xeylê xo nufûsê dewe kal û pîran ra yeno meydan. Welatijê ke problemê çiman ciwîyenê, mecbûr benê ke senîn tarî beno agêrenê keyeyê xo. Sewbîna xebitnayîşê dermanan de zî probleman ciwîyenê.

 

Hecîmeya 71 serrî û Huseyîn Aktaşo 83 serre zî dewe de ciwîyenê û bi jeneratorêk qij, dolaba xo danê xebitnayîş ke xidayê înan xira nêbê. Hacîme dîyar kena ke semedê problemê awe û cereyanî ra zehmetîyan ancenê û wina vat: "28 serrî yo vernîya ma gênê, astengîyan vejenê. Ma do senîn biciwîyê. Çimê ma nêvînenê. Şan de beno hema ma şinêmîyanê nivînan. Jeneratorêk ma yê qijî estê. Ma nê zî tena di saetan semedê dolabe xebitnenê ke xidayî xira nêbê. Ma werdê xo zî serê adirî de viraznenê. Pêwa nê emrê xo ez cil û firaqan bi destan şona. Semedê awe çin a, ma nêeşkenê ramitiş zî bikerê. Hîn darê ma verê berî de estê, heywanî înan şiknenê. Semedê cereyan çin o ma nêeşkenê mudaxele zî bikerê. 28 serrî yo cuye çin a. Ma se kerd zî bê netîce mend."

 

'Ma do verê walitî de protesto bikerê'

 

Huseyînî zî derheqê babete de wina vat: "PKK kerdî bahane û dewa m aveşnayî. Ma bi serran o dewa xo ra dûr mendî. 19 serrî dima ma ameyî. La dewe wêran bibî. Ma bi deyn keyeyê xo awan kerdî. La cereyan nêdanê. 8 serrî yo ma mîyanê tarî de yê. Bi desan rey muracat kerd. La qet ma goşdarî zî nêkerdî. Semedê cereyan çin o, şan de ma heywanê xerîbî ke yenê verê berî zî nêvînenê. Tena cereyan ney, awe û rayîr zî çin o. Ma nêeşkenê baxçeyê xo awe bidê. Dewe de cuye nêverdayê. Ma şî verê keya. Eke problemê ma nêrê çareserkerdene ma do verê walîtiyî de dest bi çalakîya protestoyî bikerê. Êdî bes o."