RIHA - Keyeyê Şenyaşarî roja 83ine ya cigêrayîşê edaletî de eşkerayî da û vat: “Wa tu şik û gumanê şima çinbo, ma do her roje hesap persbikerê.”

 

Nobeta “Edaletî” ya Keyeyê Şenyaşarî ke 3 ferdê ci hetê Parlamenterê AKPyî yê Rihayî Îbrahîm Halîl Yildiz ra ameyî qetilkerdene roja 83yîne de dewam kena. Emîne û Ferît Şenyaşar yê ke nobeta xo ya "Edaletî" dewam kenê, semedê sînorkerdişê vejîyayîşê teberî keye de çalakîya xo dewam kenê.

 

‘Ma do hesap pers bikerê’

 

Keyeyê Şenyaşarî, roja çalakîya xo ya 83ine de, serê hesabên xo yê medyaya dîjîtalî wina vatî: “Ma dozgerê ke dewa ra ewnîyenê ra vanê, ‘Ma 23 kesî nêweşxane de semedê kiştişî kom bîbî, tespît kerdo.’ Gelo dewleta huqûqî çi pawena ke çîyo lazim bikera. Ma amadeyê ke nê îdîayê xo bi belgeyê fermî zî dayî werte. Wa tu şik û gumanê şima çinbo, ma do her roje hesab pers bikerê.”