COLEMÊRG - Endama Meclîsê Cinîyan ê HDPyî Selcan Saygi derheqê grevê vêşanîye ke tepişteyan bi amancê tecrîdê serê Rayberê PKKyî Abdullah Ocalan bêro wedaritene, dayê destpêkerdene de ercnayîş kerd û dîyar kerd ke ganî waştişê tepişteyan bi ca bêrê.

 

Tecrîdê serê Rayberê PKKyî Abdullah Ocalan ke 22 serrî yo Zîndanê Tîpê F yê Asayîşê Berzî ê Îmraliyî tepişte yo, her ke şino giran beno. Tepişteyê PKK û PAJKî bi amancê ke binpaykerdişê heqan yê zîndanan peynî bibo, 27ê Teşrîna Peyêne 2020 de dest bi grevê vêşanîye ya bêdem û bidor kerdî û çalakîya grevî 184 rojî pey xo de verd.

Endama Meclîsê Cinîyan ê Geverî ya HDPyî Selcan Saygi derheqê grevê vêşanî de ercnayîş kerd.

 

‘Çimeyê probleman tecrîd o’

 

Selcane dîyar kerd ke Rayberê PKKyî Abdullah Ocalan 22 serrî yo binê tecrîdî de yo û vat, tecrîd tena bi Îmraliyî sînor nêmendo û wina vat: “Tesîrê serê heme şarê Rojhelatê Mîyanên kerdo. Çimeyê problemê Tirkîya yenê ciwîyayîş girêdayê tecrîdî yo.”

 

‘Rayîrê çareserîyê demokratîkî Îmrali yo’

 

Selcane wina vat: “Amancê girankerdişê tecrîdî oyo ke welat ver bi kaosî berê. Bi serran o ma vanê. Ma sey şarê kurd vanê ke rayîrê çareserîyê demokratîkî Îmrali ra derbas beno. Yewin adres aştîye Îmrali yo.”

 

Vengdayîşê wayîrvejîyayîşê grevan

 

Selcane rewşa grevê ke dewam keno de vat, nêweşîya korona ra grev hîna giran derbas do bibo û vat: “ Ganî tepişteyê ke grev de yê, derûdorê înan pak bibo. Tepişteyê grev de yê bedenê înan vîrusî rê akerde yo. Heme zîndanan de serê tepişteyê sîyasîyan de tedayê cidî estê. Binpaykerdişê heqan esto. Waştişê tepişteyan waştişê ma yo. Ma wayîrê grevê înan vejênê û vengdayîşê wayîrvejîyayîşî kenê.”

 

‘Ganî her kes berpirsîyarîyê xo bi ca bîyarê’

 

Selcane peynîya qiseykerdişê xo de veng da îqtîdar û wezaretê selahîyetdaran kerd û vat: “Ma vengdayîşê xo bi israr kenê. Ma do bikerê zî. Hema ke merdimî nêmerdê, tabutî zîndanan ra nêvejîyayê, ganî îqtîdar game bierzo. Ganî her kes berpirsyarîyê xo bi ca bîyaro. Ma veng danê şarê xo kenê ke wayîrê çalakîya grevî vejê.”