ÎZMÎR - Merdima Mahmut Ulusa yê tepişteyî, Hamayîl Guven derheqê grevê vêşanîye de qisey kerd û vat ke ganî goş bidê waştişê tepişteyan û ganî pêvînayîş bi Rayberê PKKyî Abdullah Ocalanî dir bêro kerdene.

 

Grevê vêşanîye yê bêdem û bidor ke hetê tepişteyan ra bi amancê ke tecrîdê serê Rayberê PKKyî Abdullah Ocalanî ra bêro wedaritene û binpaykerdişê heqê zîndanan peynî bibo, ame destpêkerdene, dewam keno. Tepişteyê bi nameyê Mahmut Ulusa 27 serrî yo tepişte yo û nika Zîndanê Kandirayî yê. Waya Mahmut Ulusa, Hamayîl Guven dîyar kerd ke birayê ci zî bi eynî waştişî kewto grevê vêşanîye û vat: "Têkoşînê kurdan heqdar o. Her kesî ra vanê terorîst. Yê kewtê grev, heqê xo wazenê. Vanê wa tedayê zîndanan peynî bibê. Leyla Guven tay mendib bimiro. Çira pêvînayîş nêkenê. Verdê wa meydanan de qisey bikerê. Çira nêverdenê qisey bikerê?"

 

Merdimê tepişteyan rê zehmetî vejenê 

 

Hamayîle dewam de wina vat: "Ma wextê ke şinê pêvînayîşan, ma xeylêk rastê zehmetîyan yenê. Saetê pêvînayîşî zaf qilm o. Şîyayîş û ameyîşan de deqeyê ma derbas benê. Ma nêeşkenê zîndan rê pere bidê, vanê şêrê postexane. Ma tay pere şawenê, vanê şima çira şawenê? Maye û pîyê ma merd. Bêşik ez o bişawî. Ma heta şawenê bêzar benê. Fotografê ma ancenê, rêçe engiştan û çiman gênê. Wextê pêvînayîşî qedêno hema newe ma vejenê."

 

Kurdî nasnameyê xo wazenê

 

Hamayîle wina vat: "Tepişteyî semedê heqê xo wazenê, yenê tepiştene. Xora kam heqê xo biwazo, goreyê înan terorîst o. Ez terorîst nîya la ê terorîst ê. Ê zulm şarî rê kenê. Tutan û cinîyan rê kenê. Ma wazenê şarê ma azad bo. Nasnameyê Kurdan qebûl nêkenê. Ma wareyê ma ra kenê. Wazenê ma bibê tirk. Ma kurd ê û heqê xo wazenê, nasnameyê xo wazenê."

 

Çira destûr nêdanê? 

 

Hamayîle tewr peyîn wina vat: "Abdullah Ocalan zî rayberê kurdan o. Ma wazenê ma azad bê, nasnameyê ma bibo. La nêdenê. Her kesî terorîst vînenê. Tepişteyî grev de yê, semedê heqê xo grev de yê. Wa tedayî peynî bibê. Tay mendibi Leyla Guven bimiro.  Gelo no edalet o? Verdê wa meydanan de qisey bikerê. Ma nasnameyê xo wazenê. Ma nêwazenê kes bimiro."