Sema Çaglak

 

AMED - Endama Meclîsê Partîya DBPyî Zeyneb Uren bale ant serê awankerdişê yewîye û vat: "Lazim o  êdî ma berjewendîyê neteweyî bidê vernî. Coka ganî ma bibê yew. Yewîye do hemverê hêrişan biba qalxanêkê."

 

Operasyonê dersînor yê Artêşa Tirkî yê hemverê Herêma Federal a Kurdistanî dewam kenê. Pêwa operasyonê ke yenê kerdene de vengdayîş û xebatê yewîye dewam kenê. Bi taybetî herême de bi rayberîya Partîya Herêma Demokratîk (DBP) xebatê yewîye yenê kerdene. Derheqê babete de endama Meclîsê Partîya DBPyî Zeyneb Uren ajansê ma rê qisey kerd.

 

Zeynepe destpêkê qiseykerdişê xo de wina vat: "Kurdî destpêk de xo bi metodê hêriş û kabîleyan xo pawitê. Dinya de her ke şi xopawitiş de vurnayîşî virazyayî. Serdemê nika de yo ke ma ci rê erey mendî, xopawitişê ma yê hemverê hêzê dinya yo. Se rey çi heyf ke ma rîyê erdî parçe parçe bîyê. Her çiqas cografyaya kurdan parçe parçe biba, mezg de zî parçebîyayîşêk ameyo meydan. Heta ma mezgê xo de yewîye nêviraznê ma nêeşkenê cografya xo de viraznê. Ma her hat ra bihêz û dewlemdn ê labelê semedê ma yew nîyê tu wext o hêz û dewlemendî nêeşkayo bibo netîceyêk serkewte."

 

'Ganî kurdî xo zîhnîyetê parçebîyayîş ra xelas bikerê' 

 

Zeynepe, bale ant serê polîtîkayê taybetî yê hemverê kurdan û vat: "Hemverê îşxalkerdişî amanc kenê kurdê modern awan bikerê. Ganî kurdî xo şarê taybetî ra bipawê. Bîyayîşê ma yew o, ziwanê ma yew o la kurdê cor û cêr dayê awankerdene. Pêwa nê çîyan ganî ma bizanê ke serê kurdan de wazenê çi ferz bikerê û vera nînan ma do senî xo ver bidê. Cewabê nê pêro çîyan yewîye ya. Yewîye zî mezg de dest pêkena. Lazim o ke ma berjewendîyê eşîrî û keyeyî bidê hetêkê û berjewendîyê neteweyî bidê vernîya xo."

 

'Kurdistan de serebûtî girêdayê yewbînan ê'

 

Zeynepe bale ant serê bîyayîşê ke Herêma Federal a Kurdistanî de qewimyenê û wina vat: “Nakokîyê PDKyî estê û do virazyê zî. Labelê ganî destûr nêdo ke cografyaya Kurdistanî bêro îşxalkerdene. Nikam başûr de heme het ra cografyaya ci yena talankerdene. Labelê hemverê nê helwestêk nîno ramojnayîş. Ma bawer nêkerdêne ke hetê herêma başûrî ra hende bêvengîyêk virazyo. Bendewarîyêk ma estbi. Semedo ke şarê Kurdî bi hezar serrî yo hende bedel dayo, dej anto, lazim o no îşxalkerdişê serê herra başûr de yeno kerdene, qebûl nêkero. Eke ewro erdê başûrî bêro îşxalkerdene, heme erdê Kurdîstanî yeno îşxalkerdene.  Kurdistan de heme hedîse û parçe girêdayê yewbînanê. Serkewtişê kurdêk serkewtişê heme kurdan o. Qelsbîyyaîşê kurdêkê qelsbîyayîşê heme kurdan o. Dimayê açarnayîşî pêşmergeyan qetlîamêk pîl başûr de ame kerdene. Wextê ke Saddam qetlîam kerd,î nêvat no/na kurd hetgirê min o, yan zî a partî ra yo, nê peşmerge yê. Rasterast kurdan qetil kerd. Coka ma mîyanê xo de bibê yew. Ganî Herêma Federal a Kurdîstanî baş bizano ke kesê ke nika paştdayîş danê do siba zî hêriş bikerê."

 

'Cinî do bibê rayberê yewîye' 

 

Zeynepe tewr peyîn wina vat: "Cinîya  kurde tarîxê xo de senîn ke ziwan û kulturê xo pawito eynî wextî de zî xeylêk dej anta zî. Ma hêvî kenê ke cinîyê kurdî semedê yewîye rayberî bikerê. Demo ke ma cografyaya Kurdistanî ewnîyeno kerra serê kerra de nêmendo. Ewro merdim şêro kam ci şaristanê kurdan xoza ameyo talankerdene û texrîpkerdene. Hemverê her tewir hêriş û îşxakerdişî ez vengdayîşê yewîye kena. Yewîye do hemverê hêrişan bibo qalxanêkê."