Gulîstan Azak

 

DÊRSIM - Gulîzar Taş ke semedê polîtîkayê şerê taybetî dewa înan ameye vengkerdene û reyke bîn agêra, dîyar kerd aye bikişê zî êdî hew dewa xo ra vejêna û dewijanê xo yê ke koç kerdê rê vengdayîşê agêrayîşê dewe kerd.  

 

Dêrsim de semedê polîtîkayê şerê taybetî dewê ke hetê dewlete ra ameyî rijnatene, vengkerdene, nika hetê welatijê ke peyser agêrayê dewe newe ra yena awankerdene û welatijî wayîrê xoza û kulturê xo vejênê. Yew nê dewan ra dewa Hanî ya ke giradayê Hakîsî û girêdayê Kisle yê Dêrsimî ya.

 

2008ine de welatîyê ke dest bi agêrayîşê dewe kerdî semedê dewa xo awan bikerê, mektebê dewe, bereqe û çadiran de mendî. Cinîyê dewe sewbîba lazimîyê xo zî pincarê ke qilê koyan de yê arêdanê. 

 

‘Nebatî semedê dermankerdişî zî yenê xebitnayene’

 

Gulîzar Taş 59 serrî ya û agêraya dewa xo. Gulîzare wina qalê cuya xo ya dewe kerd: “Ez serê sibayî vejêna koyan û heta şan de manena. Ez nebatan kom kena. Ez nê zî maya xo ra musaya. Ez Gulerse, vilan, helîk, sir û gozan arêdana. Ma hem wenê û hem zî roşenê. Hem zî ma semedê dermankerdişî xebitnenê. Heme nebatê koyê ma şîfa yê. Nimûne; vilî. Hetê vîtamînê C de xeylêk dewlemend ê. Merdiman nêweşî ra pawenê. Semedê nêweşîya bîrove, semedê hemoroîtî baş ê. Eke mar û dûpişkî bidê yewî de sey derman yena xebitnayene. Ez nê maya xo ra mûsaya.”

 

‘Xoza newe ra gane bî’

 

Gulîzare dîyar kerd wextê keyeyê aye koç kerdo 14 serrî bîya û vat: “Wextê ma ameyî, ma dewa xo nas nûkerd. Her çî veşabi. Xoza bi ameyîşê ma dir gane bî. No vurnayîşê xoza ma ser o tesîr kerd. Hema zî qedexeyî estê. Reyan dewam keno. Ne rayîrê ma ne keyeyê ma esto. Ez çadire de manena. Awankerdişê dewe de cinî rayberî kenê. Cinî zor û zehmetî ancenê. Ma pîya paştdayîş de yê.”

 

‘Ma fek dewa xo ra vera nêdanê’

 

Gulîzare tewr peyîn wina vat: “Mi bikişê zî dewa xo ra nêvejêna. Dewa ma ameye talankerdene, veşnayene û wêrankerdene. Bi rayberîya cinîyan ma semedê dewa xo têkoşîn kerd. Mayê ma bi hesretê dewa xo şîyî rehm. Semedê ma vîrardişê înan bidê ciwîyayîş, ma agêrayî dewe. Ma do nêverdê ke herra ma talan bikerê. Ma bikişê zî ma fek herra xo ra vera nêdanê. Ma do nêverdê bîyayîşê ma çin bikerê û ma do cuya xo newe ra awan bikerê.”