AMED - 782 avûkat û huqûqnasan pare kerd ke caardişê waştişê pêvînayîşê bi avûkatanê Abdullah Ocalanî şertê dewleta huqûqî yo û dest pê kampanyaya îmzayan kerde. Avûkatan vat: “Waştişê caardişê huqûqî heq û wezîfeyê hemwelatbîyayîşî yo.”

 

Komeleya Huqûqnasan a Seba Azadîye (OHD) seba Rayberê PKKyî Abdullah Ocalanî dest pê kampanyaya îmzayan kerd. 728 avûkat û huqûqnasan îlanêk da rojnameyê Yenî Yaşamî û bi nê hawayî kampanya pare kerd. Avûkatan waşt ke wa Abdullah Ocalan cade avûkatanê xo bivîno.

 

Hemserekê verênî yê Partîya Demokratîke ya Şaran (HDP) Selahattîn Demîrtaş, Hemsereka Komeleya Heqê Merdiman (ÎHD) Eren Keskîn, avûkatê namdarî Ercan Kanar, avûkatê Buroyê Huqûqî yê Asrinî zî morê xo da binê kampanya. Metnê kampanya de ame vîrvistene ke 7ê tebaxe ra nata Abdullah Ocalan nêeşkeno avûkatanê xo bivîno, Abdullah Ocalan wazeno avûkatanê xo bivîno û cewabdayîşê nê watişê ey şertê dewleta huqûqî yo.

 

Metnê kampanya wina yo: 

 

“Çapemenîye û rayaumûmîye rê, 

 

Goreyê huqûqê neteweyî û globalî heqê tepişteyan esto ke avûkatê xo bivînê. Avûkatî unsurê bingeyî yê heqanê merdiman ê, garantîyê vera kerdişanê xiraban ê. Rixmê nê ewcedarîye û ferzê qanûnî mîyanê 10 serranê peyênan de têna 5 reyan destûr dîya ke Abdullah Ocalan avûkatanê xo bivîno. 7ê tebaxa 2019î ra nata pêvînayîşî bi her hawayî yenê astengkerdene. Eşkerayîya peyêne ya Abdullah Ocalanî ke resaye rayaumûmîye a ya ke o wazeno avûkatanê xo bivîno. Rewşêka eqsê ney vera qanûnanê Komara Tirkîya ya, vera peymananê mîyanneteweyîyan a ke Tirkîya zî morê xo da binê înan. Waştişê caardişê huqûqî wezîfe û heqêko bingeyî yê hemwelatbîyayîşî yo. Bi rêzdarî ma pêşkêşê rayaumûmîye kenê.”