Şehrîban Aslan

 

SÊRT - Avûkata Baroyê Sêrtî û endama Platformê EŞÎKî Sîbel Guneş Tardu, ‘Prosesê taqîbkerdişê parlamenteran’ ke EŞÎK dayo destpêkerdene ercna û vat: "Bi xeyrê prosesî ma do bimusê ke çiqas heqê cinîyan zî gêrenê."

 

Platformê Cinîyan ê semedê Têduştîye (EŞÎK) 10ê Gulane ra nata eşkerayî da '7 herêmê Tirkîya û 81 şarsitanê ci bi seyan cinîyê parlamenterê xo girewtê taqîbkerdişî' weşêna. Eşkerayî de ame dîyarkerdene ke EŞÎK gulana  2021 ra dima bi amancê, dimayê feshkerdişê Pêkerdişê Stenbolî ke heqêq amebi bidestkerdene yê cinîyan bi, do parlamenteran bigirî binê taqîbî. Kampanya ke ameya destpêkerdene de herêmê baroyê Amed, Êlih û Sêrtî ca gênê.

 

Endama Platformê EŞÎKî û avûkata Baroya Sêrtî Sîbel Guneş Tardu derheqê kampanya de zanayîş da.

 

‘Hedefo tewr pîl oyo ke bi înan game peyser bidê eştene' 

 

Sîbele ard vîr ke rojnameyê fermî de ameyo eşkerakerdene do pêkerdiş 1ê Temmuze de werte ra bêro wedaritene û vat: "Hemverê bêhuqûqî feshkerdişê Pêkerdişê Stenbolî, EŞÎK ‘prosesê taqîbkerdişê parlamenteran’ dayo destpêkerdene. Hedefê ma yê tewr pîl oyo ke feshkerdişê pêkerdişî peyser bêro antene. Sewbîna dimayê feshkerdişî parlamenteran falîyetêk kerdo yan ney, derheqê nê de ma do raporêk amade bikerê ke raya umumî bivîna. Ma do win abivînê ke çiqas ameyo qiseykerdene. Amancêk bîn zî oyo ke teda serê meclîs de bêro awankerdene. Semeod ke hîna zaf qalê cinîyan bibo, ma do parlamenteran taqîb bikerê. Ma cinî têkoşînê xo rêxistinkerde kenê û ma tîya yê."

 

'Do taqîbkeerdişêk hîrê perîyot bibo'

 

Sîbele wina qal kerd: "Nê taqîbkerdişî do bi periyotê 15 rojan ra heta 1ê Temmuze bêrê dewamkerdene. Do taqîbkerdişê ma yê ewil, serê hesabê çapemenîya dîjîtale ya parlamenteran bo û ma do uca ra taqîb bikerê ka çi pare kenê û se kenê. Diyîn zî qiseykerdişê  meclîsî, eşkerayîyê înan yê partîye û hîrên zî parekerdişê înan çapemenîya herêmî de bibo. Dima ra ma do raporêk amade bikerê û pêşkêş bikerê.”

 

'Ma do taqîbkerdişê xeylêk çîyan bikerê'

 

Sîbele dewam de wina vat: "Ma do vatişanê, ‘bayan û cinî’ biewnê ka yeno xebitnayene yan ney. Yew sernameyê tewr girîng no yo; m ado biewnê ka têkilîyê înan bi STKyan dir kam ci sewîya de yo. Çimeyo esas ê tedayê serê meclîsî hemkarîyê bi STKyan dir o. Dima ra zî ma do taqîbkerdişê rewşa feqîrîya cinîyan, vatişê nefretî yê hemverê LGBTÎyan, kiştişê cinîyan û şîdetê serê cinîyan de bikerê. Sewbîna avûkatî muracatanê xo de cayê senî tercîh kenê? Cayê k eyenê tercîhkerdene cinsperestê yan ney? Nimûne; qehwe yo, kulubê sporî yo. Ma do înan ra biewnê. Ma do taqîbkerdişê xeylêk çîyan bikerê."

 

Sîbele tewr peyîn wina vat: "Nika ma mîyanê xo de Amed, Êlih, Sêrtî de xebatan kenê. 7 herêmê cîya estê. Yanî ez eşkena vaja ke sazbîyayîşêk têmîyan, koordîne bi. Ma do bi hawayêke çalak xebatanê xo bikerê."