Sema Çaglak

 

AMED - Lahîya Ozturk 27 serrî yo aqûbetê mêrdeyê xo Vasîf Ozturk pers kena û wazena ke edalet bi ca bêro. Lahîya, dîyar kerd ke têkoşînê 27 serran do dewam bikero.

 

Mabêne 17-31ê gulane sey Hewteyê Têkoşînê Hemverê Vinîbîyayeyan ameyo destpêkerdene. Serranê 1990 de 17 hezar merdimî ke ameyî vinîkerdene, hema zî aqûbetê înan dîyar nîyo û kesê ke rewşa înan dîyar bî zî semedê muhakemeyêk baş nêame kerdene, kiştoxê înan serbest ameyî veradayene. Merdimê vinîbîyayeyan ke waştî aqûbetê merdimanê xo pers bikerê, ameyî têhet û û çalakîya “Merdimê Vinîbîyayeyan" dayî destpêkerdene. Çalakîyê ke ameyî kerdene, her het ra ameyî astengkerdene. La keyeyî zî vera pêro astengîyan, peyser game nêeştî."

 

Yew nê keyeyan ra zî Lahîya Ozturk ke aqûbetê mêrdeyê xo Vasif Ozturkî 27 serrî yo pers kena ya. Mêrdeyê Lahîya serra 1994 de netîceyê oparasyonê leşkerî ê bejayîyê Pasûrê Amedî yeno kerdene de aqûbetê ci ra xebera nîna girewtene. Vasif Ozturk ke o wext dewa Cumhurî Pasûr de bi, bi Cembelî Tuncer û  Efendî Şen dir yeno destbendkerdene û şewêke mektebê dewe de yenê tepiştene. Serê sibayî de Cembelî û Efendî yenê veradayene, goreyê zanayîşê ke kesê bîyê şahidê serebûtî dest, ling û çimê Vasif Ozturkî yenê girêdayene û esparê helîkopterî kenê û dewe ra benê.

 

'27 serrî yo semedo ke esteyê ci bivîna têkoşîn kena'

 

Lahîya dîyar kerd ke 27 serrî yo semedê cenazeya mêrdeyê xo bivîna û kerdoxê ci bêrê vînayene, têkoşîn kena. Lahîya vat: "Ez hende serrî yo semedê esteyê mêrdeyê xo bivîna, yan zî parçeyêk cilê ci û rêçek ci bivîna têkoşîn kena. Gama ke mêrdeyê mi ame vinîkerdene, tutê mi xeylêk qij bî. 27 serrî yo ma xeylêk pey ci kewtî. O wext ma Pasûr ra şî Licê. Ma ra vatî kesêk wina çin o. Her çiqas ma têkoşîn dayîne, hende zî vernîya ma girewtêne. La ma tu wext fek têkoşînê xo ra vera nêda. Ma wazenêke goristanêk ci bibo û tutê ma şêrê ser."

 

‘Dewlete wazena ma aqûbetê înan bikerê milê partî'

 

Lahîya dewam de vat, dewlete wazena ke ma aqûbetê înan bikerê milê PKKyî û dewa safî bikerê û vat: "Nêzdîbîyayîşê dewlete wina bi. Çinbîyayîşê mêrdeyê mi xeylêk tesîr ma ser de kerd. Dimayê ci pêro barî kewtî serê paşta mi. Tutê mi pîyê xo nas nêkerdî. No çi zaf zehmet o. Ez hem semedê aqûbetê mêrdeyê xo û hem zî semedê tutanê xo her wext mîyanê têkoşîn de bîya."

 

‘Tutê mi sêwî mendî'

 

Lahîya dewam de wina qal kerd: "Wexto ke mêrdeyê mi ame vinîkerdene, tuta min a tewr qije 3 mengî bî. Tutê mi sêwî mendî û perîşan bî. Dimayê ke mi ÎHD nas kerd, ma dest bi têkoşînê huqûqî kerd. Ma muracatê DMMEyî kerd. La ne DMME û ne zî hukmê dewlete muracatê ma qebul nêkerd."

 

‘Têkoşînê ma do dewam bikero'

 

Lahîya tewr peyîn wina vat: "Ma xeylêk bedel da û ma hema zî têkoşîn kenê. Bi serran o ma aqûbetê merdimanê xo pers kenê la dewlete tu cewab nêdana ma. Semedo ke dewlete bi xo vinî kerdê, nêeşkena cewabêke bida. Heta roja ewro ma senî semedê merdimanê xo têkoşîn kerd, ma do tîya ra tepya zî wina dewam bikerê.  Heta kiştoxî bêrê muhakemekerdene û ez esteyê mêrdeyê xo bivîna do têkoşînê ma dewam bikero."