RIHA - Hemsereka Pêroyî ya HDPyî Pervîne Buldan verê Edlîyeya Riha de herinda Emîne Şenyaşar û Ferît Şenyaşar ameyî destbendkerdene de nobeta edaletî girewte.

 

Hemsereka Pêroyî ya HDPyî Pervîne Buldan seba ke keyeyê Şenyaşarî û dadîya Vervatoxa TJA Ayşe Gokkana tepişte Lutfîye Gokkan zîyaret bikera ameye Riha. Pervîne rêxistina HDPyî ya Xelîlîye ya Riha zîyaret kerde. Endamanê Meclîsê Mayanê Haştîye Pervîne pêşwazî kerde. Vervatoxê HDPyî Ebru Gunay, wekîlî Ayşe Surucu û Mahmut Togrul zî Pervîne reyde bîyî.

 

Pervîne uca de qisey kerd û vat: “Welatêk de ke tede huqûq, wijdan çin o ma nê hukmatî ra edalet hêvî nêkenê. Têkoşînê keyeyê Şenyaşarî têkoşînê ma yo. Ma ameyî dejê keyeyê Şenyaşarî pare bikerê la semedo ke ma ameyê ê ameyî destendkerdene. No bêhuqûqî, bêedaletî û bêwijdanî ya. Keyeyê Şenyaşarî şima ra zulm nê edalet paweno, newe ra muhakemekerdiş wazeno. Çunke dosyaya girînge û diyîne ya serebûtî ameye mîyankerdene. Êyê ke nê cînayetî kerdî qetî wa bêrê cezakerdene. Wa keyeyê Şenyaşarî cade bêro veradayene. Ewro beno ke keyeyê Şenyaşarî tîya de nîyo la ma bi hawayêkê temsîlî çalakîya roniştişî ya înan kenê.”

 

Wexto ke Pervîne qisey kerdêne Emîne Şenyaşar û Ferît Şenyaşar ameyêne destbendkerdene.

 

Pervîne naye ser o şîye verê Edlîyeya Riha û herinda Emîne û Ferît Şenyaşarî de bi hawayêkê sembolîkî nobeta edaletî girewte. Polîsan kerd ke heyet asteng bikerê.