Rojda Aydin 

 

ŞIRNEX - Hemşaredara HDPyî Cizîrî ya ke vera ci qeyûm ame tayînkerdene Bêrîvan Kutlu bale ant serê tecrîd û grevê vêşanîye û vat: "Tu hêvîya ma huqûqê zereyî û mîyanneteweyî nêmendo. Ganî ma vera tecrîdî bibê yew û wayîrê waştişê tepişteyan vejîyê."

 

Tecrîdê serê Rayberê PKKyî Abdullah Ocalanî 23 serrî yo dewam keno. Avûkatê Abdullah Ocalanî, dimayê 8 serran mabêne 2-22yê gulane, 12-18ê hezîrane û 7ê gulana 2019ine de şîbî Îmraliyî. Mîyanê 22 serran de tena 2 rey bi telefon keyeyê xo dir qisey kerd. Reya ewil 27ê nîsana 2020ine de tena 20 deqîqeyan telefon de qisey kerd. Tewr peyîn zî serê îdeayê medya dîjîtalî de ameyî kerdene, dimayê reaksîyonê komelî 25ê adara 2021ine de Edliyeyê Rihayî tena 4.5 deqîqeyan bi rayîrê telefonî birayê xo Mehmet Ocalanî dir qisey kerd.

 

Hemverê tecrîdî û binpaykerdişê heqê tepişteyan 27ê teşrîna peyêne 2020ine de tepişteyê PKKyî û PAJKî dest bi grevê vêşanîye kerdî. 175 rojî yo grevê vêşanîye yê tepişteyan dewam keno. Sewbîna Wargehê Multecîyan ê Şehîd Rustem Cûdî (Mexmûr) zî bi rayberîya Meclîsê Îştarî grevê vêşanîye ame destpêkerdene, çalakîya tîya zî 155 rojî yo dewam keno. Reyna bi rayberîya Tevgerê Ciwanan ê Şorişgêran (TCŞ), Tevgerê Cinîyan ê  Kurdistanî yê Ewropayî (TJK-E) û Merkezê Kulturê Kurdistanî Kampa Lavrîo ya Yunanîstanî de çalakî ameye destpêkerdene û çalakî 137 rojî yo dewam kena.

 

Derheqê tecrîd û grevê vêşanîye de Hemşaredara Partîya Demokratîke ya Şaran (HDP) ya Cizîrê ya Şirnexî ke vera ci qeyûm ame tayînkerdene Bêrîvan Kutlu ajansê ma rê qisey kerd.

 

'Huqûqê mîyanneteweyî bêveng o'

 

Bêrîvane, destpêkê qiseykerdişê xo de tecrîd şermezar kerd û wina vat: "Birêz Abdullah Ocalan xo mîyanê komelî de xo dayo qebulkerdene. Ewro şexsîyetê birêz Ocalanî de bi mîlyonan kesî yenê tecrîdkerdene. Bi esîrgirewtişê birêz Ocalanî ser o huqûq û edalet ame binpaykerdene. Heqê ey ameyo binpaykerdene û bi tecrîdî dir rî bi rî mendo. Çi heyf tîya huqûqê zereyî û mîyanneteweyî hemverê birêz Ocalanî de çim û goşê xo padayê. Vanê ma nêdîyo, nêeşnawito û qisey nêkena."

 

'Heqê tepişteyan yeno binpaykerdene'

 

Bêrîvane, dewam de wina vat: "Kesê ke vanê ez heqê merdiman û tepişteyan pawena wa hemverê bê huqûqî vengê xo berz bikerê. 27ê teşrîna peyêne 2020ine de tepişteyî hemverê tecrîd û binpaykerdişê heqê tepişteyan dest bi grevê vêşanîye kerdî. Tirkîya de heqê heme tepişteyan yeno binpaykerdene. Çalakîya ke ameya destpêkerdene, çalakîya meşrû û xozayî ya. Lazim o ma bibê vengê tepişteyan, semedo ke ewro seba ameyoxê ma grev de yê. Embazê ma yê ke xo ver danê, semedê astengîyê selahîyetdarê zîndanan nêeşkenê bi telefon pêvînayîş bi keyeyê xo dir bikerê."

 

Berîvane wina qiseykerdişê xo qedêna: "Ganî ma reyke de wirzê serê lingan û paştdayîş bidê waştişê tepişteyan. Ganî ma înan tena nêverdê. Dem demê xo rêxistinkerdîşî yo. Wa raya umumî zî êdî veng vejo. Ganî ma bi vindertişê xo tecrîd werte ra wedarnê."