Habibe Eren

 

STENBOL - Avûkata Buroyê Huqûqê Asrin Raziye Ozturk, derheqê tecrîdê Îmraliyî de ercnayîş kerd û vat, muracatê înan yê semedê pêvînayîşî ê Dadgerîyê Înfazê Bursa yenê kerdene, roja bîn yenê redkerdene. Razîye dîyar kerd ganî nêro xo vîr ra kerdene ke tecrîd roj bi roje vila beno û giran beno.

 

Rayberê PKKyî  Abdullah Ocalan 22 serrî yo binê şertê tecrîdê giran de zîndanê Tîpê F yê Asayîşê Berzî yê Îmraliyî de maneno. No demêk derg o pêvînayîşê rî bi rî bi keye û avûkatan dir nêkerdo. Hîn îdiayê ke çapemenîya dîjîtalî de vejîya û bi reaksîyonê komelî dir birayê ey Mehmet Ocalan 25ê adare de pêvînayîşêk bi telefon bi rayberê PKKyî Abdullah Ocalanî dir kerd. Pêvînayîş nîme de amebi birnayene, tena 4,5 deqe dewam kerdibi.

 

Abdullah Ocalan pêvînayîşê qilm de wina vatibi: "Dewlete zî şaş kay kena, şima zî. No huqûqî nîyo. Rast nîyo" û bi nê vatişan dir reaksîyon vera bêhuqûqîya dabi û avûkatan îqaz kerdibi. Abdullah Ocalan dîyar kerdibi ke eke pêvînayîşêk bibo, ganî  Îmraliyî de bo û waştişê pêvînayîşê bi avûkatan dir kerdibi. Dimayê nê endîşe zêde bî û hetê Buroyê Huqûqî yê Asrin de menga adare de hema hema her roje semedê pêvînayîşê lezgîn muracatê Serdozgerîya Komara ya Bursayî ame kerdene la hema zî cewab nêameyo dayene.

 

Tewr peyîn bi wesîleyê roşanê Remezanî avûkat û keyeyan muracatê pêvînayîşî kerdî. Avûkata Buroya Huqûqê Asrin ra Razîye Ozturk derheqê prosesî de ercnayîş kerd.

 

'Semedo ke zanayîş nînê girewtene endîşe zî zêde benê'

 

Razîye dîyar kerd ke Abdullah Ocalan bi komployêk mîyanneteweyî ardê Îmraliyî û no komplo dewam de yo û vat: "Birêz Ocalan 22 serrî yo binê tecrîdê girankerde yo. Pêvînayîşê keye û avûkatan nîno kerdene. Kanalê neqlkerdişî pêro girewteyê yan zî bi sînor ê. Semed nê zî na rewşa nêzelal ke bi tu hawayî zanayîş ci ra nîno girewtene, endîşeyan zî zêde keno."

 

‘Hewl danê ke komplo dewam bikerê'

 

Razîye bale ant serê zîndanê Îmrali û vat: "Zîndan goreyê Rêziknameyê Merkezê Krîzî yeno  rayberdene û dizaynkerdiş û formê îdarekerdeyî zî sey pro-guantanamo yo. Sey yeno zanayene zîndanê Guntanamo de tu metodê huqûqî nînê kerdene. Bi amancê şiknayîşê îradeyê serê serranê 2000î de netîceyê mudaxaleyê DYAyî yê Rojhelatê mîyanên kewt rojeve. Komployê Mîyanneteweyî û sîstemê tecrîdî yê Îmraliyî zî reyna bi rayberîya DYAyî

 

 çarçewaya konseptê NATO de bi amancê bêbandorkerdişê Ocalanî bi ca ame û hema zî yeno kerdene."

 

‘Abdullah Ocalanî paradîgmayêk bi hêvî awan kerd'

 

Razîye ard ziwan ke Abdullah Ocalan heme polîtîka veng veto û vat: "Nê prosesî de Abdullah Ocalan paradîgmayêk ke semedê Rojhelatê Mîyanên bi hêvî, û vera pêro polîtîkayê pelçiqnayîşî cewabêk xurt da. Ma eşkenê nê vajê, zîndanê Guantanamo nuqteya pêvînayîşan de, neqlkerdişî de zî zîndanê Îmraliyî ra xeylêk baş o. Bêhuqûqîyê Îmraliyî, Guantanamo derbas kerdo. Zîndanê Îmraliyî de metodê taybet ardê. Tu heq nîno xebitnayene. Nê caardişî goreyê pêkerdişê mîyanneteweyî nîyê."

 

‘Bi reaksîyonê demokratîk reyke bîn vejîya werte'

 

Razîye dîyar kerd ke dimayê qiseykerdişê telefonî tu xebere Abdullah Ocalan ra nêameya girewtene û vat: "Îdiayê derheqê weşîye û cuya Abdullah Ocalanî de estê. Semedê nê îdiayan ma bi tu hawa nêeşkenê çîyêk asan bigîrê dest. Ne hetê ma de, bi reaksîyonê demokratîk yê ameyê ramojnayîş sero reyke bîn vejîya werte. Netîceyê nê de zî 25ê adare de pêvînayîşêk kilm ê telefonî ame kerdene."

 

‘Tecrîd her ke şino giran beno'

 

Razîye pêvînayîşê peynîya telefonî zî wina ercna: "Birêz Ocalan heqê ke fînayîşê pêvînayîşê telefonî, şexsê xo û şarî de nîno qebulkerdene vîneno. 22 serran de sîstemê tecrîdî yê giran de pêvînayîşêk qij yê telefonî sey çîyêk pîl pêşkêş kerdî, nêeşkeno bêro qebulkerdene. No zî bi amancê bêvengkerdişê reaksîyonan o. La ganî nêro xovîrrakerdene ke tecrîdê Îmraliyî her ke şino giran û tewr kûr beno. Menga adare de ma her roje muracatê pêvînayîşî kenê. La çi heyf, tu cewab nêameyo dayene."

 

'Pêro waştişê ma yenê redkerdene'

 

Razîye dewam de wina vat: "23 adare ra dima muracatê ma nêameyî cewabkerdene. Nê ser de ma muracatê Dadgerîya Înfazî yê Bursa kerd. La roja bîn qerarêk ke pêro waştişê ma ameyê redkerdene dayî. Îtîrazê ma hemverê qerarê redkerdişî de zî hema nêameyo cewabkerdene."

 

Razîye bale ant serê qerarê Dadgeha Heqê Merdiman ê Ewropayî (DMME) 2014ine de derheqê caardişê zîndanê Îmraliyî dayo zî qisey kerd û dîyar kerd ke dimayê qerarê başbîyayîşêk nêvirazîyayo, verpayê ci îşkence û tecrîd zêdeyêr bîyo.

 

‘Girankerdişê tecrîdî, nîşaneyê israrê nêçareserî yo'

 

Razîye wina qedêna: "Tirkîya verpayê qanûn û pêkerdişê mîyanneteweyî têgêrena. No caardiş zî her cayê Tirkîya de vila bîyo. Mekanîzmayê huqûqê zereyî netîcegirewtişî ra dûr ê. Vindertişê pasîf yê mîyanneteweyî zî çi heyf paştdayîş dano girankerdişê tecrîdî. Girankerdişê tecrîdî zî israrê nêçareserî û pêrodayîşan o."