Gulîstan Azak

 

DÊRSIM - Endama Heyetê Îdarekarîya MÇDyî Sevîl Dogan dîyar kerd ke şewatê daristanan yew parçeyê "polîtîkayê bêmerdim verdayîşî" yenê kerdene û vat, ê daristanan dewlete ra pawenê û vengdayîşê îstîfayî selahîyetdaran rê kenê.

 

Herêmê Koçerî, Derekoy, Amutkaya yê girêdayê Hozatî yê Dêrsimî 9ê gulane de operasyonê leşkerî ameyî destpêkerdene û dimayê operasyonî şewato ke ame destpêkerdene dewam keno. Semedê tefênayîşê şewatî tu mudaxale nêame kerdene û reaksîyonê vera nê roj bi roje dewam kenê. Derheqê babete de Mudurîyê Pêroyî yê Daristanî eşkerayî da û îdia kerd ke rastîyê xeberan çin o. Walîtîya Dêrsimê zî 13ê gulane de eşkeray da û her çend vajo, şewatê daristanan çin o zî, herême de 9 rojî yo şewat dewam keno. Endama Heyetê Îdarekarîyê Komeleya Derûdorî ya Munzurî (MÇD) Sevîl Dogan derheqê şewatî de ercnayîş kerd.

 

‘Polîtîkayê bêmerdim verdayîşî yo'

 

Sevîlê reaksîyon ramojna û vat, şewat netîceyê operasyonê leşkerî de destpê kerdo û amanc oyo ke herême bêmerdim verdê û vat: "Yê ke herême de ciwîyenê û serdestê cografyayê zanê ke babeta şewatê daristanan, babeta ewro nîya. Hêrişê hemverê Dêrsimî, ko, herre û merdimê ci xo seperneno serranê 1937-38ine. Yew parçeyê polîtîkayê bêmerdimverdayîşî bêşik şewatê daristanan o. 1994ine de vengkerdişê dewan, ambargoyê xida û koçberkerdiş ameyî ciwîyayîş û ewro zî cayê xo herêmê qedexeyê leşkerî rê verdayê. Çimeyê dewe yê herême zozan ê. Nê welatî pesdewarî kenê û çimeyê înan no yo. Nê serebûtî ke yenê meydan bêşik tesaduf nîyo. Nê polîtîkayê bê merdim verdayîşî yê dewlete yê."

 

'Ganî îstîfa bikerê'

 

Sevîle sebebê ke mudaxaleyê şewatî nîno kerdene zî wina "Eke mudaxalekerdiş rê destûr bidê, ganî şewat qebul bikerê. Ma sazgehê herême û û şexsan veng da selahîyetdaran. La eşkerayîyê ke semedê vengdayîş ame kerdene wina bi, ‘xeberê bêbingeh ê.’ Ma Komeleya Derûdorê yê Mûnzurî serê Twîtterî de hstagê ‘#DersimYanıyorSesVer’ vengdayîşê wayîrvejîyayîşê kerdî."

 

'Wareyê cuya pesdewaran vila kenê'

 

Sevîle, dewam de wina vat: "Xoza û daristanî cuya ganeyan rê wayîrî kenê. Ma nêwazenê dest bidê xoza. Tena daristan ney, cuye zî yena veşnayene. Xeylêk ganeyî bi çinbîyayîşî dir ameyê rî bi rî. Ma wazenê ke şar vera her tewir hêrişê hemverê cuya xerîbî, xoza û daristanî bi rêxistin bê û vindertişê xo ramojnê. Bi nê zulmî hewl danê şar û xoza biqedênê. Yewi rayîr oyo ke ganî ma vindertişê xo bi rêxistin ramojnê. Ma şarê Dêrsimî her wext hemverê dewlete daristanê xo pawenê."

 

'Fek veşnayîşê daristanan vera bidê'

 

Sevîle tewr peyîn wina vat: "Ganî fek şewatê  daristanan vera bidê. No rastîyêk ke şarî rê nîno nimteyene yo. Her çiqas şima serê ci binimnê zî no rastîyêke yo. Ma veng danê Mudurîyê Karê Daristanî ke wezîfeyê xo bi ca bîyarê."