DÊRSIM - Qezaya Xozatî ya Dêrsimî de Oktay G., cinîya bi nameyê E.A. 7 mengî şîdet û tecawuzê ci kerd.

 

Qezaya Xozatî ya Dêrsimî ya dewa Kilîsî de Oktay G., cinîya binameyê E.A. ke pîya mendêne 7 mengî şîdet û tecawuz kerd. Serebût, dimayê ke cinîya şîdet ci rê ame kerdene xebera da pîyê xo vejîya meydan.

 

Dimayê ke pîyê E. 14ê Gulane de şi gerre kerd, Oktay G. hetê cendirmeyan ra ame destbendkerdene û la bi bahaneyê ke E. ya ameyîne tehdîtkerdene, îfade ser de nêdaya ame veradayene. Ame neqlkerdene ke şikdarî rê tena qerarê dûrvistişî ameyo dayene.

 

7 mengî ameye îşkencekerdene 

 

E. ya ke platformê cinîyan ê Dêrsimî şî serdayîşê ci, çîyê ke ameyê sereyê ci qal kerd.  E. dîyar kerd ke aye 14ê Gulane firset dîyo ke pîyê xo bigeyra, hetkarî waşta û dimayê ke pîyê ci şîyo merkezê cendirmeyan ê Xozatî gerre kerdo, şikdar ameyo destbendkerdene. E. dîyar kerd ke semedê tersî, merkezê cendirmeyan de îfade nêdaya û wina dewam kerd: "Oktayî serbest vera dayî û tena cezaya dûrfistişê keyeyî dayî. Ez şîya nêweşxane û mi raporê ke îşkence mi rê ameyo kerdene, girewt. Oktay, şandînan mi kerdêne odayêke û linganê mi bi zincîr girê dayîne. Her wext şîdet kerdêne û tecawuzê mi kerdêne, sewbîna mi tehdîd zî kerdêne. Ez, o,  dayîk û pîyê ey m apîya mendêne. Pêwa ke ma dayîk û pîyê ey dir pîya mendêne, destûr nêdayîne ke ez înan bivîna."

 

E. vizêr reyke bîn şî merkezê cendirmeyan ê Xozatî û gerre kerd. Serê gerreyî E. de, reyke bîn Oktay G. ame destbendkerdene û hema destbendkerde yeno tepiştene.

 

Platfomê Cinîyan ê Dêrsimî dîyar kerdî ke do heta peynî E. rê destek bê û ci rê bibê hetkar.