STENBOL - Komîsyonê Kultur û Hunerî yê HDKyî panelê “Tirkîya de tîyatroyê bi ziwanê dayîke, tîyatroyê kurdî” organîze kerd. Kaykerdoxê kurdî yê tewrê panelî bî, dîyar kerdî ke kayê  kurdî çiqas yenê astengkerdene zî dewam kenê û vatî, ê hêzê xo temaşkerdoxan ra gênê.

 

Komîsyonê Kultur û Hunerî yê Kongreya Demokratîke ya Şaran (HDK) çarçeweya “Kombîyayîşê Hunerî yê Aştîye” de bi rêayîrê online panelê “Tirkîya de tîyatroyê bi ziwanê dayîke û tîyatroyê kurdî" organîze kerdî. Endama Tîyatroyê Bajarî ya Amedî Berfîn Emektar, Endamê Tîyatroyê Jiyana Nû Omer Şahîn, Endamê Tîyatroyê Seyr-î û Mesel Erdal Cevîz û Endamê Tîyatroyê Wanî Mencel Ferhat Aslan sey qiseykerdox beşdarê panelî bî û bi moderatortîya Rewşan Apaydina program ame viraştene.

 

Rewşane sere de 15ê Gulane Roja Roşanê Ziwanê Kurdkî pîroz kerd û semedê ercnayîşê Tîyatroyê Kurdî heqê qiseykerdişî da qiseykerdoxan.

 

'Bi girseyî Tîyatroyê Kurdî rê wayîr vejênê'

 

Endama Tîyatroyê Bajarî ya Amedî Berfîn Emektar, bale ant serê zehmetîyê Tîyatroyê Kurdî û win avat: " Avantajê Tîyatroyê Kurdî yê tewr pîl temaşekerdox ê. Ma şinê ça, eywanê tîyatro pirr benê. Bi girseyî wayîrê Tîyatroyê Kurdî vejênê. Qeyuman xebatê ma asteng kerdî. Ma zanayîne do qeyum xebatanê ma asteng bikero. La reyna zî ma xebatanê xo dewam kenê."

 

Endamê Tîyatroyê Seyr-î û Mesel Erdal Cevîz, dîyar kerd, wextê xebatan de xeylêk reyan rastê astengîyan yenê û vat, ê xeylêk bi lehçeyê ziwanê  Kurdkî tîyatro kenê.

 

Endamê Tîyatroyê Jiyana Nû Omer Şahîn, qiseykerdişê xo de vat ke hem Tîyatroyê Kurdî, hem zî temaşewanê ci polîtîk ê.

 

Endamê Tîyatroyê Wanî Mencel Ferhat Aslan zî vat, qeyuman ra xebatê înan xeylêk yenê astengkerdene û vat: "Tena tîyatroyê Kurdî ney, qiseykerdişê Kurdî zî ma rê qedexe kenê. La dimayê nê ma giringî da xebatê xo û ma tewr zêde xebityenê."