Rojda Aydin

 

ŞIRNEX - Merdimê tepişteyan, derheqê çalakîya grevê vêşanîye yê zîndanan ke ameyo destpêkerdene û vat: "Wa tecrît bêro peynîkerdene û waştişê tutan bêro eşnawitene. Eke tecrît bêro wedaritene, do problemî bêrê çareserkerdene. Ma nêwazenê ke tutê ma zirar bivînê."

 

Çalakîya grevê vêşanîye yê hemverê tecrîdê serê Rayberê PKKyî  Abdullah Ocalanî û binpaykerdişê heqan ê zîndanan ke 27ê Teşrîna Peyêne 2020î de zîndanê Tirkîye û herême de amebi destpêkerdene, roja 172ine de dewam keno. Merdimê tepişteyan, derheqê grevê vêşanî de qisey kerdî û vatî ke wa ganî tecrîd bêro wedaritene.

 

'90 serrî ceza lajê mi rê ameye birnayene'

 

Dayîka tepişteyê bi nameyê Hîkmet Ataman ke Zîndanê Girewteyê Tîpê Eyê Orduyî de 6 serrî yo tepişte yo, Meryem  Ataman dîyar kerd ke emrê lajê aye zîndan de derbas bîyo û vat: "Lajê mi verê zî 8 serrî û 9 mengî zîndan de mend. Dima ra tehliye bi, 8 mengî teber de mend. Dima ra reyke bîn bêsûc û bi hawayêke bêhuqûq lajê mi ame tepiştene. 2 rey cezaya heta hetayî û bi pêroyî 90 serrî ceza ci rê ameye birnayene. Bi 6 serrî yo zî zîndanê Ordûyî de yeno tepiştene. Lajê mi bê sûc tepiştî. Ameyî lajê mi keye ra berdî. Tirkîya de edalet û huqûq nêmendo. Ma nêzanê rewşa tutanê ma zîndan de senîn a. Ma nê ceza qebul nêkenê. Na ceza bi hawayêke bêhuqûqî lajê mi rê ameye birnayene. Ma tu wext nê bêbextî qebul nêkenê."

 

'Kezebe ma her roje veşêna'

 

Meryeme wina dewam kerd: "Wexto ke roşan yeno semedê ma bimana yo. Ma roşan pîroz nêkenê. Wexto ke tutê ma zîndan de bê ma do senîn roşan pîroz bikerê. Emrê lajê mi zîndanan de derbasbi. Do 90 serrî senîn biqedîyo. Emrê lajê mi do zîndan de derbas bo. Kezeba ma her roje veşêna. Ma wazenê ganî  çareserîyêk na rewşe rê bêro vînayene. Wa berê zîndanan bêrê akerdene û tutê ma bêrê veradeyene. Heqê ma kurdan zî esto ke m akêfweş bê. Êdî tu kêfê ma çin o. Keyeyê ma emrê înan zîndanan de derbas bi. Êdî ma nêzanê mewsîmî senîn derbas benê. Kezeba ma dayîkan tim veşêna. Lajê mi 25 serre bi ame tepiştene û nika zî nêzdîyê 38 serrî yo. Lajê mi reyke zî 15 rojan yew hucre de mend."

 

'Bi di serrî yo lajê xo nêvînena' 

 

Meryeme tewr peyîn vat: "Semedê nêweşîye ma mîyanê endîşeyan de yê. Ma nêzanê rewşa înan senîn a. Wa berê zîndanan bêrê akerdene û heme tutê ma bêrê veradeyene. Wa êdî dayîkî bes hesrê çiman bivarnê. Serê tutanê ma de tim tedayî kerdî. Dimayê ke a cezaya giran lajê mi rê ameye birnayene, teda hîna zêde bî. Eşyayê tutanê ma bi kêfî nînê dayene. Wa çareserîyêk bêro vînayene. Tutê ma zîndanan de pûyayî. Lajê mi zîndanê Orduyî de yeno tepiştene û xeylêk dûr o. Wextê ke ma şinê pêvînayîş, ma bi rojan rayîr de manenê. Bi di serrî yo ez nêeşkaya şêra. Ma nika tena bi telefon qisey kenê. Wa dayîkî wazenê ke tecrîd bêro peynîkerdene.”

 

'Tedayê serê tutanê ma nêqedênê'

 

Dayîka tepişteya bi nameyê Bengîn Ataman ke Zîndanê Girewte yê Tîpê E’yê Orduyî de 6 serrî yo tepişte yo, Berfîn Duva zî dîyar kerd ke 2 rey cezaya heta hetayî û 72 serrî cezaya zîndanê lajê ci rê ameya birnayene. Berfîne wina vat: "Bi di serrî yo mi lajê xo nêdîyo. Ma nêzanê rewşa ci senîn a. Ma rê tu çîyêk nêvano. Heta bi heta emrê înan do zîndan de derbas bibo. Kezeba ma veşêna semedê tutanê ma. Semedê pandemî zî ma endîşe de yê. Ma tena bi rayîrê telefonî ci dir qisey kenê. Tedayî serê tutanê ma xelas nêbenê. Wa peynîya tedayan û tehdîdan bîyarê. Hacetê ke ma tutanê xo rê şawenê, nînê dayene. Hacetê ke ma înan rê şawenê zî reyan îdareyê zîndanî nêdano înan û peyser şaweno. Rewşa tutanê ma zîndanan de baş nîyan."

 

'Wa waştişê tutanê ma bi ca bîyarê'

 

Berfîne, dîyar kerd ke lajê ci demê Leyla Gûven dest bi grevê vêşanîye kerdebî zî kewto ci û vat: "O wext kom apeyîn de ca girewtibi. Lajê mi nika gurcikê ci dejenê. Gurcikê ci de kerra estê. Reyke zî emelîyat bibi. Semedê nêweşîye benê nêweşane. Semedê vîrusê 15 rojan karantîna de verdenê. Ma nêwazenê tutê ma zirar bivînê û cenazeyê înan vejîyê. Wa waştişê tutanê ma bi ca bîyarê. Wa tecrîdê serê Serekî bêro wedaritene û wa tedayan peynî bikerê. Eke tecrît bêro wedaritene do nê problemî bêrê çareserkerdene. Waştişê ma û tutanê ma cuyêka azad û heqê xo wazenê. Kesê dizd û tecawuzkar serbest vera danê. La tutanê ma semedê serê rayîrê heqîqetî de yê nînê veradayene û cezayê giranan danê. Eke tecrît serê Serekî de nêameyîne girankerdene û teber de bîne do şer zî çinbîne. Eke tecrît wirzo, do problemî çareser bibê. Ma pey tutanê xo de yê."