Medya Uren

 

MÊRDÎN - Rojname Elîşa ke îmkanê perwerdeyê bi ziwanê dayîke ra bêpar ameya verdene û her tim xeyal kerdêne biba avûkat û vat: "Werrekna ma bieşkayîne bi ziwanê xo biwanayîne û qisey bikerdêne. Eke perwerde bi ziwanê mi bayîne ez o biresayîne xeyalanê xo."

 

Şarê kurdî vakurê welatî de her tim heqê perwerdeyî û qiseykerdişî yê bi ziwanê dayîke bêpar ameyê verdayene. Sey xeylêk ziwanan Tirkîya de kurdkî ver bi çinbîyayîşî şina. Tutê ke bi ziwanê dayîke xo qisey kenê û heqê înan ke bi ziwanê xo perwerde bivînê çi heyf bêpar yenê verdayîş. Semedê nê sebeban bi hezaran tutê kurdan terk mektebe kerdî. Rojname Elîşa ke 21 serrî ya, semedo ke heqê perwerdeyê bi ziwanê dayîke bêpar yena verdayene, mecbûr manena ke fek xeyalê xo ra vera bida.

 

Rojname Elîş  serra 2000 de yena dinya. Demê ke yena dinya prosesê ke tehdîd û hêrişêk pîl serê rojnamegeran de yo esto. Coka keyeyê ci zî nameyê ci keno Rojname. Rojnameya ke Qoser de yena dinya labelê semedê feqîrî keye mecbûrî koçê metropolê Tirkîya keno. Rojname zî Manîsa de dest bi wendiş kena. Labelê semedê ziwanê dayîke perwerde nêvînena, mecbûr manena ke terkê xeyalê xo bikera.

 

'Ez tim xerîb menda'

 

Rojname qala tutîya xo kena û vana: " Mi tutîya xo de xeyalê pîl kerdêne xo verike. Seke nameyê mi ra zî yeno zanayene, ma prosesêko şer û nêweşîye de ameyî dinya û pîl bî. Semedê pawitişî şarî yenê pelçiqnayene û mi zî waştêne ez biba avûkat. Beno ke ez bibayîne avûkata rojnamegeran. La xeyalê mi dimayê ke dest bi mektebe kerd, giran ame. Semedo ke xeyalê mi û waştişê mi bêîmkan bî ney, şert û mercî giranbî. Ma bi heqê ma yê perwerdeyê bi ziwanê dayîke ra bêpar verdayî."

 

'Roja ewil şiknayîşê ke yewin bi'

 

Rojname metropol de bi çend dezayê xo dest bi wendiş kena û vat: "Semedê mektebe ez bawer a ke her tut/e kelecan bena. Ma feqîr bî. Keyeyê mi karker bi. Cil û belgê ma zî bi nê rengî bî. Roja yewin zî mi rê bibi şiknayîşêk pîl. Komêk pîl dorê ma de bi, la mi fam nêkerdêne. Tena mi fekê înan temaşe kerdêne û êdî mi qisey nêkerd. Eke mi qisey bikerdêne do bizanayîne, ez înan ra nîya. Ez tewr zêde amebîya dûrvistene."

 

'Eke perwerde bi ziwanê mi bibayîne ez o biresayîne xeyalanê xo'

 

Rojname tewr peyîn wina vat: "Qet vîrê mi ra nêşino, dezayê mi waştêne şêro daşir la semedo ke bi tirkî nêzanayîne qîrîn kerdêne. Mamoste ewnîyayîne ci ra û xo aciz kerdêne. Lazimî nêdîne ke tercume zî bikerê. Her roja ma wina derbaz bîne. Ziwanê ma ziwanêko qedexe bi. 3 serran de ez nêmusaya û mi fek mektebe ra vera da. No ten averadayîşê mektebe nêbi, teriknayîşê xeyelanê mi bi. Mi zereyê xo de pîl kerdêne. Heta roja ewro zî vîrê mi de yo. Werrekn am abieşkayîne bi ziwanê xo qisey bikerdêne û biwanayîne. O wext ma do xeyalanê azad zerrîya xo de pîl bikerdêne. Eke perwerde bi ziwanê mi bayîne, ez o biresayîne xeyalanê xo."