Derya Ren

 

RIHA - Cinîyê ke deşta Pirsûsî de serê erdê nîskan de xebityenê, dîyar kenê ke bi camêrdan dir xebityenê la goreyê camêrdan karê înan tewr giran o. Cinîyan vat ke hemverê keda xo nêgînê û keda înan çin yena hesibnayene.

 

Cinîyê ke dewa Mektelanî ya qezaya Pirsûsî ya Rihayî de ciwîyenê, serê sibayî dimayê ezanî wirzenê û şinê serê erdê nîskan. Cinîyê ke 3-4 saetan ser erdê nîskan de xebityenê, agêrenê keye û arayî kenê û dima ra reyna şinê, heta şan de xebityenê. Pêwa nê gama ke agêrenê keye zî kar pabeyê înan o. Cinîyê ke seranserê roje bi xebate derbas kenê, dîyar kerdî ke karê xo de hemverê keda xo nêgînê.

 

Cinîyan dîyar kerd bi camêrdan dir xebityenê la hêzê karî yê têduştî çin o û cinî tewr zêde xebityenê.

 

'Cuya dewe ya şaristanî ra tewr weş a'

 

Cinîya bi nameyê Zeynep Demîrbîleklî vat, mecbûr ê serê sibayî ra heta şan de bixebityê û wina dewam kerd: "Wexto ke ma yenê keye na rey ma karê keyeyî kenê. Ma nêeşkenê tutanê xo rê wext bidê. Ma semedê tutanê xo hewl danê. La ma nêeşkenê cuya tutanê xo rengîn bikerê. Ma şan de şinê keye, ewnîyenê tutan ra, werd amade kenê û cilan şino. Pêwa nê serê sibayî ma reyna wirzenê û şinê serê erdan. Mêrdeyê mi karkerê mewsîmî yo, o mecbûr o karê bînan de bixebityo. Citkarî zehmet o. Wexto ke merdim heqdestê keda xo nêgîro, merdim nêwazeno bixebityo. Eke dewlete paştdayîş nêda, zehmetî yena antene. Nimûne; emsar nîske kêm a. Ma wazenê emsar berardişî bivuryo la dewlete wexto paştdayîş nêdo ma nêeşkenê bikerê. Wextê pandemî de cuya dewe baş a. Tutê mi baş wey benê. Cuya dewe şaristanî ra tewr baş a."

 

'Hêz dano mi'

 

Uveyş Demîrbîleklî zî wina ercnayîş kerd: "Keda cinîyan tu wext nîna vînayene. Bi serran o ez bi ramitişî dir eleqedar bena. Cuya dewe zaf zehmet a la ma ci ra hes  kenê û ma nêwazenê dewe ra vejîyê. Dewe semedê weşîye merdiman zaf baş a. Ez serê erdî de kolnayîş kena. Vaş pak kena. Ma bostan ramnenê û ci dir eleqedar bena. Ma amadekarîya zimistanî zî bostananê xo ra kenê. Ez 60 serrî ya la hema zî serê erdî de xebityena. Wexto ke ez serî erdî de xebityena, xurt bena. Ez herrî ra hes kena. Wazena ci dir eleqedar biba."

 

'Roja ma bi kede derbas bena' 

 

Emîne Demîrbîleklî zî dîyar kerd ke semedê problemê awe ê Pirsûsî ra şîyê Herran û erdê pemeyî ramito. La ê agêrayê Pirsûs û wina vat: "Ma tîya erd de nîsk, genim, cew ramenê. Roja ma pêro bi kede derbas bena. Ma her wext xebityenê. Kar zehmet a la ma tena bi karêk dir eleqedar nêbenê. Keye de zî kar kena, pes ancena, nan viraznena, penîr û mast viraznena. Heywanan rê ewnîyena. Ez dewe ra hes kena. Hewayê dewe pak û weş a."