MÊRDÎN - Dayîka tepişteyo sîyasî  Serdar Yildirimo ke semedê îşkence ci rê kerdî astengdar mend, Fatma Durak û Dayîka Aşitîye Helîme İşik ke tutê ci 30 serrî yo tewrê mîyanê tevgerê azadîye bîyo, dîyar kerdî ke tutê înan semedo ke înan ra dûrî yê Roja Dayîkan bêmana ya.

 

Her serre menga Gulane de Yewşemo diyîn sey Roja Dayîkan a Dinya yena pîrozkerdene. La çi heyf semedê her dayîke na roje eynî hîsê awan nêkena. Semedo ke xeylêk dayîkî sey dayîka Fatma Duraka ke lajê ci rixmê se ra 98 astengdar o la zîndan de yo û dayîka Helîme Işika ke 30 serrî yo lajê ci tewrê mîyanê tevgerê azadîye bîyo, bi hesret na roje pêşwazî kenê.

 

Serdar Yidirim vernîya 3 serrî bi hawayêke birîndar hetê dewleta tirkîye ra ame tepiştene û bi rojan rastê îşkence ame. Semedê îşkenceyê ci rê ame kerdene, nika se ra 98 asteng dar o. Coka çend rey raporê nêweşxaneyî dir waştişname dayo zî nêno tedawîkerdene û bi mengan hucreyê yew kesî de yeno verdayene. Semedo ke nêeşkeno lazimîyê xo bi ca bîyaro,  enfeksîyon girewto. Dayîka ey Fatma Duruç rewşa lajê xo ard vîr û vat, na rewşe de ma do senîn Roja Dayîkan pîroz bikerê. 

 

'Şima kezeba dayîkan veşna'

 

Fatma vat aye wazena lajê xo dir na roje pîroz biker aû vat: "Ma zî waştêne ma nê rojan tutanê xo dir rojanê azad de pîroz bikerdêne. La ne ma ne zî tutê ma azad nêyê. Tewr peyîn Serdarî gulêke dabî mi û vatibi, gama ke ez merda, na gule bidê serê gorê mi. Gelo kesê ke nê ferqî de yê estê? Gelo zanê ke na roje semedê ma senîn yena pîrozkerdene? Kêfweşîya dayîkan tutanê înan rê girêdaye ya. Eke tutê ma kêfweş bê ma zî kêfweş ê. Vanê cenet binê linganê dayîkan de yo. Ka o qedir û qîmet. Şima kezeba dayîkan veşna."

 

'Ma tena aştî wazenê' 

 

Endama Meclîsê Dayîkan ê Aşitîye Helîme İşik zî lajê ci vernîya 30 serrî tewrê mîyanê refê têkoşînê azadîye bîyo wina qal kerd: "Ma dayîk ê û zerrîveşnaye yê. Tena waştişêk ma esto, aştîyêke mende yo. Eke aştî bêro ma do zî baş bê. La tîya her dayîkêke destê înan serê zerrîya înan de yo ka çi bi tutanê înan ame. Tutê ma yan tepişteyê yan zî verê mergî de yê. No îşkence yo semedê dayîkan."

 

'Wa tu dayîkî nêbermê'

 

Helîme wina qiseykerdişê xo qedêna: "Tirkîya de dayîkan rê taybetî zî dayîkê kurdan rê rêze nêna girewtene. Bi tutanê înan, înan îşkence kenê. O bes nêyo, dayîkan bi xo îşkence kenê. Ez Roja Dayîkan bi zerrêke dej derbas kena. Nika bi hezaran dayîkê ma yê ke tutê înan şehît kewtê. Zîndanan de yê yan zî ameyê vinîkerdene. Bi taybetî na roje înan rê pîroz kena. Bi hêvîya ke tu dayîkî nêbermê û xemgîn nêbê."