Gulîstan Azak

 

AMED - Yew şaristanê ke feqîrî ci de xeylêk zêde yo Amed o. Cinîyê Amedijî dîyar kerdî ke ê hetkarîya dewlete wazenê, ê kar û heqê xo wazenê.

 

Semedê pandemî krîzê ekonomî her ke şino giran beno û netîceyê ci de zî welatijî hemverê feqîrî têkoşîn kenê. Welatijê ke netîceyê krîzî kûr de hîs kenê, semedê lazimîyê xo, şinê cayê ke xida yenê vilakerdene û bi saetan dore de vindenê. Welatijê ke bi saetan semedê xidayê bêpere dore de vindenê, reaksîyon ramojnayî.

 

Amed de cinîyan ajansê ma rê ercnayîş kerd.

 

'Yê ke feqîr nêyê bi saetan wina nêpawenê'

 

Cinîya bi nameyê Fatma Ozdemîr wina vat: "Ma nêeşkenê debara xo bikerê. Semedê feqîran hetkarî ney, kar lazim o. 4 tutê mi betal ê. 54 serrî ya. Kar gêrena. Ma nêeşkenê nan berê keyeyê xo. Werrekna şima dolaba ma bivînayîne. O wext şima do m abaş fam bikerdêne. Yê ke ma bivînê çin ê. 40-50 cinî bi saetan o, semedê kîsikêk xida pawenê. Yê ke feqîr nêyê, nînê tîya bi saetan nêpawenê."

 

'Ma hewceyê poşetêke xida yê'

 

Hasîbe Karli dîyar kerd ke sebebê feqîrî betalî yo û vat: "Cinîyê nika tîya pabeyê, keyeyê înan nêxebityenê. Sebebê feqîrî betalî yo. Bi kîsikêk xida debarî nêbena. Awe esta, ceyran, kîra esta. Ma nêeşkenê debara xo bikerê. Her kes betal o. Ma hewceyê kîsikêk xida yê."

 

'Ma heqê xo wazenê'

 

Cinîya bi nameyê Vahîbe Ortaç ke dewa Tîlaloyî ra ya dîyar kerd ke aye tena ciwîyena la meaşê aye ya teqawîtbîyayîşî qîm nêkeno û wina vat: "Ez na rewşe de ya, bifikrîyê yê şaristanan se kenê. Ez fatureyê awe, ceyran û telefonî dana. Çîyêk cêbê mi de nêmaneno. Hukmat wişto kartolan vila keno. Şarhetkarî nêwazeno, şar kar wazeno. Tutê mi, tornê mi yê ke unîversîta qedênayê estê betal ê. Tornê ke mi şaristan de bi, semedê betalî agêra dewe. Ciwanî betal ê, întîxar kenê. Wextê ke ma xeberan wanenê, kezeba ma vêşena. Ma hetkarîya dewlete nêwazenê, ma heqê xo wazenê."

 

'Ma kar wazenê'

 

Emîne Ortaj zî wina vat: "Ma nêeşkenê debara xo bikerê. Heme çî vay o. Ma ameyê wina sewîyeyêke, ma hewcedarê nanî yê. Wa heqê ma bidê ma. Ma kartolan nêwazenê. Ma do bi kartolan se bikerê gelo? Ka rûn esto? Ma hetkarî ney, ma kar wazenê. Bi seyan kesî semedê pandemî kar ra ameyî eştiş. Semedê nê her kes feqîr kewtî. Semedê nê hizûr keye de qedîyayo. Ma heta nika dewlete ratu çîyêk nêwaşt, la nika ma heqê xo yanî kar wazenê."