Sema Çaglak - Şehrîban Aslan

 

AMED - Semedê dayîkê kurdan; cayêke şer, bêadeletî, bêwijdanî û bêhuqûqî bibo uca de senîn Roja Dayîkan bêra pêşwazîkerdene? Dayîka Rozerîn Çukur, Fahrîye Çukur û dayîka Helîn Şen, Nazli Şen û sey bi hezaran dayîkê kurdî zerrî veşnayene. Her di dayîkî dîyar kerdî ke semedê tutanê xo û tutanê kurdan do têkoşînê xo yê edaletî dewam bikerê.

 

Roja Dayîkan temamê dinya de yena peşwazîkerdene. Cayê ke şer û pêrodayîş esto, na roje semedê dayîkan hende pîroz nêya. Na rewşe semedê dayîkê kurdan zî derbas bena. Dayîkê ke parçeyêk xo şer de vinî kerdê, yan zî heta peynîya emrê xo çimê înan verê paca û beran de bendeyê agêrayîşê tutan mendê, na roje semedê înan bi dej a. Nînan ra yew zî dayîka Rozerîn Çukur, Fahrîye Çukur û dayîka Helîn Şen, Nazli Şen a. Fahrîye û Nazli derheqê Roja Dayîkan de ajansê ma rê qisey kerdî.

 

'Ez nêeşkena nê dejî qal bikera'

 

Rozerîn Çukura 17 serrî 8ê çeleyî ya 2016ine Sûr de ameye qetilkerdene. Cenazeya Rozerîne 6 mengî ra dima teslîmê keyeyî ameye kerdene. Dayîka aye Fahrîye wina qal kerd: "Dejê mi sey roja ewil a. Ez nêeşkena nê dejî qal bikera. Hema zî vana qey do cayêk ra vejîya. Ez zana ke êdî nîna la ez nêeşkena nê çî qebul bikera. Gama qalê Rozerîne yeno kerdene, kezeba mi veşena. Kiştiş qîm nêkerd, bi mengan cenaze nêdayî ma. Tu heqê kesî çin o zulmêk wina bikero. Xeylêk keyeyî estê ke  hema cenazeyê tutanê xo nêdîyê. Ciwanê ke goristanê bêkesan de ameyê definkerdene estê. Tu cayê dinya de bêwîjdanîyêk wina çin o."

 

'Xeylêk çî mojna mi'

 

Fahrîye dîyar kerd ke bê Rozerîne 5 serrî yo roja dayîkan pîroz kena û vat: "Rozerîna mi xeylêk merdimêka bi wijdan û birehm bî. Xeylêk çî mijna mi. Eynî wextî de mamosteya mi bî. Nêverdayîne kesêk mi ra çîyêk vajo. Rayberî kerdêne. Wexto ke roja dayîkan ameyîne, semedê mi her wext bernameyêk viraştêne. Her serre na roje de pereyê xo kom kerdêne û dîyarî girewtêne. Sewbîna şîîere nuştêne û mi rê wendêne. Wexto ke şîîere wendêne ma zaf bîne hîsgêr. Pêro şîîaranê xo de ca dayîne tutan û dayîkan. Şîîra xo ya peyîn de wina vatibi, 'Ti semedê mi xeylêk bi qîmet a. Başe ke tu dayîka min a û roja to bi zerrî û can pîroz kena'..."

 

'Xeylêk tutî ameyî kiştene'

 

Fahrîye, tewr peyîn wina vat: "Belê mi Rozerîna xo vinî kerd la xeylêk tutê sey cewherî zî ameyî vinîkerdene. Her tutê ke hay xo yê semedê mi sey Rozerîne yê. Rozerîne hêvî dayîne derûdorê xo. Tim bi moral bî. La Rozerîne emrê qij de ameye kiştene. Tena ez ney, xeylêk dayîkî sey min ê û semedê pêro tutan kezebe înan veşana. Ê dayîkî bi kede û zehmetî tutanê xo pîl kenê. No çi wijdan o? No çi bêedaletî yo?” 

 

'Ma do taqîbkerdoxê dewa bê'

 

Dayîka Helîn Şen, Nazli Şen zî dîyar kerd ke heta ke edalet bi ca bêro û kiştoxî bêrê muhakemekerdene xo ver bidê û vat: "Kênaya 12 serrî bî û Sûr de ameye qetilkerdene. Kênaya mi hedef girewtî. Kiştoxê aye eşkerayê. La pêwa nînan nînê muhakemekerdene. 4 serrî ra dima dewa abî. Ma nê nêzdîbîyayîşî qebul nêkenê. Çi heqê înan esto ke zulm bi ma kenê. La heta ke emrê ma bibo ma do pey dewaya xo de bê. Kênaya mi semedo ke nan bigîra vejîya teber û ameye kiştene. Kezeba mi veşnayî. Ma dayîkî heta ke ma ra bêro ma do fek dewaya xo ra vera nêdê. Ma do nêverdê ke gonîya tu mehsumêk erd de bimano."

 

'Bê Helîne ez xo nîmced vînena'

 

Nazliye tewr peyîn wina vat: "Helîne tu wext Roja Dayîkan xo vîr ra nêkerdêne. A roje rew aya bîne û dîyarîyêk girewtêne. Mo kerdêne xo verike, wina zerrîya mi geş kerdêne. La nika Helîna mi çin a. Gama ke bena Roja Dayîkan ez xeylêk pê dejena. Xo nîmced hîs kena û nêweş hîs kena. Wexto ke babete bena Hêlîne hêsirê mi nêvindenê û ez nêeşkena qisey bikera."