Dîlan Babat

 

ENQERE - Îqtîdaro ke Pêkerdişê Stenbolî fesh kerd  û gumanbaran pawit, na menge de bi sebebê merdişê 17 cinîyan. Goreyê bîlançoyî menge de 12 cinîyî bi şikdar dinyaya xo bedilnayî û 5 cinîyî zî rastê hewldayîşê qetilkerdişê ameyî, 3 tutî zî ameyî qetilkerdene.

 

Bi feshkerdişê Pêkerdişê Stenbolî de menga nîsane de zî bi dayeyê ke ameyê dayene, ame vînayene ke camêrdan çiqas cesaret girewto. Cinî keye, kuçe, kargerîyan hetê camêrdan ra ameyî qetilkerdene. Cinîyan vat, ‘ma fek Pêkerdişê Stenbolî ra vera nêdanê' pankartê înan ameyî qedexekerdene û semedê kuçe terk nêkerdê, cezaya pere înan rê ame birnayene.

 

Wezaretî dest bi girewtişê dayeyan kerd

 

Yew madeyê girîng yê Pêkerdişê Stenbolî o bi ke dewlete derheqê şîdetê camêrdan de dayeyan bigîra. La hukmat dimayê feshkerdişê pêkerdişî, girewtişê dayeyan ra fek vera da. Wezaretê karê zereyî, îdia kerd ke tesîrê pêkerdişî, kiştişê cinîyan de çin o û dest bi girewtişê bîlanço kerd. Goreyê dayeyê wezaretî, menga Nîsane de 17 cinî ameyî qetilkerdene. Nê dayeyê wezaretî zî ramojna ke asayîşê ganê cinîyan çin o û pêkerdiş çend girîng o.

 

Menga Nîsane de 17 cinî ameyî qetilkerdene

 

Goreyê Platformê Ma do Kiştişê Cinîyan Vindarnê (KCDP) menga Nîsanê de 17 cinî ameyê qetilkerdene û 14 cinî bi hawayêke şikdar dinyaya xo bedilnayê.

 

Ma sey ajansêk her menge xeberê ke kewenê keyepelan, hedîseyê şîdetê camêrdan kom kenê û şima dir pare kenê. Goreyê cigêrayîşî, menga nîsane de 17 cinî hetê camêrdan ra ameyê qetilkerdene û 12 cinî bi guman merdê. 5 cinî bi qetilkerdiş dir ameyî rî bi rî. 3 tutî hetê camêrdan ra ameyî qetilkerdene. Îstismar 5 tutan rê ame kerdene û tutêke bi hawayêke şikdar dinyaya xo bedilnaye.