Sema Çaglak-Şehrîban Aslan

 

AMED - Esnafê cinî yê Amedî bale antî serê qerarê  qedexekerdişî û reaksîyonê xo yê vera qerarî bi nê vatişan ramojnayî: "Dewlete welatijî û esnafan bi mexdûrîyet û feqîrî rî bi rî verdena. Ma nêzanê mîyanê 17 rojan de se bikerê, senî lazimîyê xo bi ca bîyarê û senî debara xo ya rojane bikerê.”

 

Serekkomarê AKPyî Tayyîp Erdoganî dimayê kombîyayîşê kabîneyê qerarê çarçewaya tedbîrê vîrusê koronayî (Covîd -19) raya umumî rê eşkera kerdî. Çarçewaya qerarê ameyê girewtene de, Tirkîya 29ê Nîsane ra heta 17ê Gulane derbasê prosesê ke "Her kes keyeyê xo de bimano" bî. Bi eşkerakerdişê nê qerarî de nêrazîbîyayîş û reaksîyonê şarî zî rî dayî. Esnafê ke bi serrêke ra zêdeyêr kargehê înan padaye mend zî reyke bîn kargehê înan ame padayene û semedê înan tu hetkarî nêamî dayene. Esnafê cinî yê Amedî zî bi pêroyî bale antî serê esnafan, bi taybetî zî esnafê cinî û nêzdbîyayîşê dewlete ya hemverê înan.

 

'Mexdûrîyet û feqîrî yena ferzkerdene'

 

Cinîya Esnafe Sabrîye Çelîkkol ke 12 serrî yo esnaf a dîyar kerd ke nêzdîbîyayîşê dewlete hemverê esnafan nîno qebulkerdene û vat: "Xora vernîya pandemî de krîzêk bi. Bi pandemîyî dir no krîz tewr zêde kûr bi û nika zî bi qedexekerdişî r atewr zêde esnafî tesîr bî. Ez ne eşkena kîrayê kargehê xo bidî ne zî eşkena faturayanê xo bida. Ma do se bikerê ez nêzana. Dewlete welatijî û esnafan bi mexdûrîyet û feqîrî dir rî bi rî verdena. Bi taybet semedê esnafan tu destekêk û hetkarîyêke nêdana."

 

'Zehmetîyê esnafê cinî di qat bi zêde'

 

Sabrîye bale ant serê esnafê cinîyan û vat: "Cinîyê  esnafî hem barê keyeyî serê paşte înan de yo û hem zî yê teberî. Semedê nê mexdûrîyeto tewr zêde cinîyê esnafî ciwîyenê. Ma nê prosesî de vîna ke xeylêk esnafî semedê krîzî dikanê xo padayî. Nê esnafê ke dikanê xo padayî zî tewr zêde cinîyê esnaf ê. Xora gama esnafe cinî bo, bar tewr giran beno. Esnafê camêrdî eşkenê karê cîyan de bixebityê û saetê ereyî de eşkenê bixebityê. La çi heyf semedê hişmendîyê camêrdê serdest ê mîyanê komelî de rewşe semedê cinîyan cîya ya û karê înan zehmet beno."

 

'Hem qedexe kerdî û hem zî hetkarî nêdayî'

 

Cinîya esnafe Celîle zî dîyar kerd ke vernîya pandemî de xeylêk mûşterî bîyê la dimayê pandemî rewşe vuryaya û vat: "Hem rewşa welatijan dîyar o, hem zî rewşa esnafan verê çiman de yo. Xora ma kîrayê dikanî nêeşkenê vejê.  Nika zî destê ma de tu çîyêk çin o. Ma faturayê xo yê awe û ceryanî zî nêeşkenê bidê. Serra vîyarte de vatî, ma hetkarî danê û pereyo ke qîmê fatureyanê ma nêkeno dayî. Kîrayê dikano tewr qij hezarêke ra zêdeyêrî yo. Ez wazena pers bikera, ma bi nê pereyî heqê awe bidê, ceyran yan zî kîra bidê. Hem qedexe kenê, hem zî hetkarîyêke nêdanê."

 

'Ma nêzanê senî lazimîyê xo bi ca bîyarê'

 

Celîle tewr peyîn wina vat: "Bi serran o esnafî bi xeylêk problemê ekonomîye dir rî bi rî yê. Hema zî  nê probleman rê çareserîyêk nêameyo vînayene û nika reyke bîn esnafan kenê mîyanê bîrêk bê bin. Ma nêzanê mîyanê 17 rojan de çi bikerê, senîn lazimîyê xo bi ca bîyarê û senîn debara xo ya rojane bikerê."