Derya Ren

 

AMED - Cinîyê ke tecrîdê serê Rayberê PKKyî Abdullah Ocalan de yeno kerdene, şermezar kerdî û dîyar kerdî ke do semedê wedaritişê tecrîdê Îmraliyî de yeno kerdene wedarnê, do bibê rayber. Cinîyan sewbîna dîyar kerd ke sebebê tecrîdî, tersê hemverê fikrê Ocalanî yo.

 

Tecrîdê giran yê serê Rayberê PKKyî Abdullah Ocalan ke 22 serrî yo zîndanê Asayîşê Berzî yê Îmraliyî de yeno tepiştene, dewam keno. Abdullah Ocalan ke demêko derg bi, bi avûkat û keyeyê xo dir pêvînayîş nêkerdibi, 25ê adare de birayê ey Mehmet Ocalanî bi telefon pêvînayîşêkê kerdibi la telefon 4 deqe dima amebi birnayene. Birnayîşî telefonî her çiqas bi însanan dir endîşe abikero zî selahîyetdaran derheqê nê de eşkerayîyêke nêda, gamêke nêeştî.

 

'Fikrê Ocalanî ra tersenê' 

 

Îdarekarîya Partîya Herêmê Demokratîke (DBP) ya Amedî Hasîbe Yazlik derheqê babete de ercnayîş kerd û dîyar kerd ke tecrîd sûcê merdimayî yo û wina vat: " “Ewropa tecrîd sey îşkence vînena û semedê nê zî îmza eşta. La îmzaya ke Ewropa eşta tena serê kaxidî de menda. Zîndanan de qanûnî bi ca nînê. Şexsê birêz Ocalanî de serê pêro komelî de tecrîd kenê. Sebebê teda û tepişteyan, serewedaritişan hemverê hukmatî yo. Sûc çi beno wa bibo nêzdîbîyayîşêk goreyê rûmetê merdiman tu wext nîno qebulkerdene. Ma zî qebul nêkenê û nê anê ziwan. Birêz Ocalan demêko derg o bi keye û avûkatan dir nêeşkeno pêvînayîş bikero. Pêvînayîşê telefonî yê peynî ke xeylêk kilm dewam kerd zî, ramojneno ke fikrê Ocalanî ra tersenê."

 

'Ma do bi rayberîya cinîyan tecrîd wedarnê' 

 

Hasîbe dewam de wina vat: "Sîstem her wext cinîyan hedef gêno û cinî her wext bi teda dir rî bi rî manenê. La tu wext ma sere nêtewêna. Îradeyê ma cinîyan xeylêk xurt o. Ez bawer kena ke do tecrîd bi rayberîya cinîyan bêro şikinayene."

 

'Gelo guna nîyo?'

 

Cinîya tepişteyê bi nameyê Ramazan Tanriverdî ke Zîndanê Tîpê F yê Asayîşê Berzî yê amedî de maneno, Hanim Tanriverdî grevê ke ameyê destpêkerdene silam kerd û dîyar kerd ke 30 serrî yo mêrdeyê aye tepişteyo û vat. "Ez wazena ke selahîyetdarî rojêke roşanî de keyeyê xo û tutanê xo ra derbas bikerê. Belkî o wext merdimî fam bikerê. Homayî zulm qedexe kerdo. La nika ma ewnîyenê ke her ca de zulm esto. Ma kurd ê û ma do her wext kurd bê. Semedo ke ma kurd ê rastê tedayan yenê. Mêrdeyê mi semedo ke sereştişê koguşan qebûl nêkerd, mengêke qedexeyê pêvînayîşê telefonî dayî. Gelo guna nîyo?"

 

'Ganî tecrîd bêro wedaritene'

 

Hanime wina reaksîyon ramojna: " Îmraliyî de tecrîd dewam keno. Semedê tecrîd wirzo, ma do her tewir têkoşîn bikerê. Eke tecrîdê serê Abdullah Ocalanî peynî nêbo,  tecrîdê serê komelî zî peynî nêbeno. Çir akurdan rê hende dişmin ê. Lîderê pêro şaran esto. Rayberê şarê Kurdî zî Ocalan o. Eke berê Îmraliyî bêrê akerde û prosesê diyalogî dest pêbikero, do şer zî peynî bibo. Bi teda û tepiştişan nêeşkenê biresê cayêk. Ocalan her wext hetê aştîye bi. Ocalan her wext têduştî waşt. Ma zî nê wazenê û ganî lezabez tecrîdê Îmraliyî peynî bibo."