Sema Çaglak - Gulîstan Azak

 

AMED - Cinîyê ke sazgehê sivîlan de ca gênê, reaksîyon vera betalkerdişê Pêkerdişê Stenbolî dayî û vatî: "Ma do hemverê betalkerdişê pêkerdiş û hişmendîyê peyser têkoşnêko hempar bikerê. Ganî bêro zanayîş ke ma tu wext fek kuçeyan ra vera nêdanê."

 

20ê adare de bi îmzeyê Serekkomar Recep Tayyîp Erdoganî Pêkerdişê Stenbolî ame betalkerdene. Semedê cinîyê Tirkîya betalkerdişê pêkerdişî bi rojeva sereyîn. cinî hemverê betalkerdişî vejîyayî meydanan û reaksîyonê xo ardî ziwan. Goreyê dayeyê ajansê ma serra 2020ine de 332 cinî hetê camêrdan ra ameyî kiştene. 6 hewteyê destpêkê 2021ine de zî 6 cinî hetê camêrdan ra ameyî kiştene. Dimayê betalkerdişê pêkerdişî zî mîyanê 7 rojan de 12 cinî ameyî kiştene. 20ê adare ra heta nika zî 32 cinî hetê camêrdan ra ameyî kiştene. Derheqê babete de temsîlkarê rêxistinê sazgehê sivîlî ajansê ma rê qisey kerdî.

 

'Ez nêwazena bi şîdetî dir rî bi rî bimana'

 

Hemsereka Komeleya 78ine Halîse Batgî derheqê betalkerdişê pêkerdişî de wina vat: "Ma nê qerarî nas nêkenê. Qey Tirkîya texteyê viraştiş û xirakerdşî ya? Wexto ke karê ci yena îmza kena û gama ke karê ci nîna zî betal kena. Xora rewşa cinîyan a  Tirkîya wertede ya. Wazenê probleman serê cinîyan de meşrû bikerê! Cinî wazenê heqê xo bipawê. Pêkerdişê Stenbolî destkewtişêke ê cinîyan o. Cinî vana ez nêwazena şîdet bivîna, nêwazena bêra qetilkerdene."

 

'Pêkerdişê Stenbolî dano ciwîyayîş'

 

Endama Heyetê Îdarekara Egîtîm-Senî Ezgî Çelîk zî wina bale ant serê kiştişê cinîyan: "Bi betalkerdişê Pêkerdişê Stenbolî hûmara kiştişê cinîyan zêde bena. No çî merdiman keweno mîyanê endîşe. Ma kuçeyan de vanê, 'Pêkerdişê Stenbolî dano ciwîyayîş', no sloganêke wina rêze ra nîyo. Eynî wextî de rastîyêk o. Semedê Pêkerdişê Stenbolî bêro tesdîqkerdene, ganî têkoşînê cinîyan nêvindero."

 

'Hişmendîyê serdest tehemulê têkoşînê cinîyan nêkeno' 

 

Hemsereka Sendîkayê Kedkarê Xizmetê Komelî û Weşîye (SES) ya Rihayî Eylem Salar reaksîyonê xo yê hemverê betalkerdişê Pêkerdişê Stenbolî de wina vat: "Tirkîya dewleta yewine bî ke Pêkerdişê Stenbolî îmza kerd û la nika zî betal kena. No çî bi tu hawa nîno qebulkerdene. Tehamûlê hişmendîyê serdestî yê camêrdan têkoşînê cinîyan rê nêmendo. Semedê  têkoşînê cinîyan asteng bikerê, çi destê înan ra yeno kenê. La ma fek kuçeyan ra vera nêdanê û ma do semedê Pêkerdişê Stenbolî bi ca bêro têkoşînê xo dewam bikerê."

 

'Ma do nê qerarî qebul nêkerê'

 

Komeleya Edebîyat, Huner û Kulturî ya Cinîyan (KASED), mamosteya resimî Neşe Toprak, dîyar kerd ke betlakerdişê pêkerdişî merdimî şaş verdeno û vat: "Betalkerdişê Pêkerdişê Stenbolî qerarêko ca de nîyo. Xora ma her wext vînenê ke çiqas cinî yenê qetilkerdene û bi şîdetî dir rî bi rî manenê. Ma qerarê betalkerdişî qetî qebûl nêkenê  semedo ke nêwedaryo çi gerek keno ma do bikerê."

 

'Ma do kuçeyan de bê'

 

Mamosteya muzîkî Evîn Tiryakî, dîyar kerd ke betalkerdişê pêkerdişî tesîr serê pêro cinîyan de keno û vat: "Ganî cinî hemverê betalkerdişî bibê yew û kuçeyan de bê. Ma do hemverê hişmendîyê serdest ê camêrdan de her wext çalakger bê."

 

'Îqtîdar hêzê cinîyan ra terseno'

 

Arjîn Încî ke xebatê sazgehê sivîlan de ca gêna wina vat: "Cinîyan serê îqtîdarî de tersêk awan kerdo. Semedo ke cinîyan ra tersenê, no qerar ameyo girewtene. Senîn ke Pêkerdiş ame betalkerdene û mîyanê mengêke de bi desan cinî ameyî kiştene. Dewlete bi nêzdîbîyayîşê xo, şîdetê hemverê cinîyan tesdîq kena. Cinîyî zî vera îqtîdarî xo ver danê û heta ke biresê amancê xo do têkoşînê xo dewam bikerê."