Medya Uren

 

MÊRDÎN - Dayîka tepişteyo  nêweşî Mehmet Zerdeşt Oduncu ke pêwa raporê 'zîndan de nêeşkeno bimano' 7 serrî yo hucreyê yew kesî de yeno tepiştene, Selma Oduncu dîyar kerd ke Zerdeşt hemverê tecrîd û binpaykerdişê heqan têkoşîn keno û vat: "Bibê vengê tutanê ma."

 

Tepişteyê sîyasî yê PKK û PAJKî 27ê teşrîna peyêne 2020ine de, bi amancê peynîkerdişê tecrîdê serê Rayberê PKKyî Abdullah Ocalan ke 22 serrî yo Zîndanê Îmralîyî yê Asayîşê Berzî yê Tîpê F de yeno tepiştene û binpaykerdişê heqan ê merdiman ke zîndanan de zêde bîyo, dest bi çalakîya grevê vêşanîye kerdî û roja xo ya 143ine dewam kenê.

 

Mehmet Zerdeşt Oduncu ke 17 serreyê xo de yeno tepiştene, hemverê tecrîdî adir vera dano canê xo. Dimayê ke tedawîyê ey qedêna, heta roja ewro têkoşînê xo yê hemverê tecrîdî dano dewamkerdene. Tepişteyo nêweş Zerdeşt, pêwa ke raporê 'nêeşkeno zîndan de bimano' zî 7 serrî yo hucreyê yew kesî de yeno tecrîdkerdene. Pêro heqanê xo yê rojane û cuye ra zî yeno mehrûmkerdene. Coka bi çalakîya grevê vêşanîye zî tecrîd şermezar keno.

 

Cezaya muebbetî ci rê danê

 

Mehmet Zerdeşt Oduncu serra 2013ine, hema 17 serreyê xo de kar de yeno tepiştene û bi îşkenceyê giranî dir rî bi rî maneno. Dayîka ey Selma Oduncu ke qalê tepiştişê ci kena vana, ez şîya Zîndanê Mêrdînî ke ci de ameyîne tepiştene û semedê îşkenceyê ke ci rê ameyo kerdene, rewşa ey giran bî, nêeşkayîne qisey bikero û nêeşkayîne serê lingan de vindero. Serra 2014ine de hemverê tecrîdê serê Rayberê PKKyî Abdullah Ocalan û komployê mîyanneteweyî yê 15ê Sibate adir vera da canê xo. Ey wirzenneê nêweşxane û dimayê prosesê tedawî wexto ke o beno 20 serre cezaya muebbetî ci rê danê.

 

'Hema birînî baş nêbîbî ceza dayî'

 

Selma wina qalê çalakîya Zerdeştî kerd: "Ey bê sûc û sebeb serê karî de tepiştî. Îşkence ci rê kerdî û ey mergî ra tewr xirab kerdî. Zerdeşt hema tut bi, bi îşeknceyê înan bi kalêko pîl. Hemverê tecrîdî û hemverê bêheqîyan bedenê xo veşna. Bi xo dir ruhê mi zî berd. Ez nêweşxane de bi rojan serê sereyê ey de êdî êdî merda. Yê ke nê dejî bi ma dayî antiş, fedî nêkerdî û cezaya muebbetî dayî. Hema birînê ey baş nêbîyê. Nika zî bedenê ey reng bi reng o. Bedenê ey awe kom keno. Nêweşîya kezebe ey dir vejîyaya. Gonî qelibneno. La nîno tedawîkerdene. Derman zî nêkenê."

 

'Tepişteyî yenê tecrîdkerdene'

 

Selma bale ant serê rewşa Zerdeştî ya weşîye ser û vat: "Doktoran ci ra vat, kezaba to vinderta. Êdî na nêweşîye ey heta sax bo, dewam bikera. Ganî semedê nêweşîya xo, werdê bi sole biwero û ganî bi dîqet tedawî bibo. Goreyê ke Zerdeşt ma rê qal keno, semedê îşkence, werdê lêşinan înan rê benê. Ê nêeşkenê biwerê. Pêr heqanê xo ra yeno mehrûmkerdene. Ê yenê tecrîdkerdene."

 

'Semedê ceza her çî bi sînor kerdê'

 

Selma dewam de win avat: "Zerdeşt surgunê Zîndanê Tîpê F yê Edîrneyî kerdê. Heta ke ez şina, ez zehmetîyan ciwîyena. Xora semedo ke cezaya ey giran a, di rey yeno tecrîdkerdene. Her çî semedê na ceza yeno sînorkerdene. Qiseykerdişê telefonî yê ke her hewte yeno kerdene, ma menga ra di rey ci dir kenê. Pêvînayîşan de tena ez û tutî ma eşkenê şêrê. Tornê mi, mi çend rey berd verê berî, la destûr nêdayî. Bi 7 serrî yo hucreyê yew kesî de yo, ma bes nîyo her çî asteng kenê."

 

'Bibê vengê tutanê ma'

 

Selma tewr peyîn wina vat: "Tepişteyî tecrîd de yê. Ez veng dana sîyasetmedar, selahîyetdar û şarê kurdî ke hîsgêr nêzdîyê prosesî bibê. Bibê vengê tutanê ma. Wa peynîya tecrîdo girankerde bêro. Bi seyan tepişteyê nêweşî sey Zerdeştî yenê tepiştene. Nêeşkenê lazimîyê xo yê rojane zî bi ca bîyarê. Nê kesê wina do çi zirar bidê dewlete? Yan tutanê ma bidê ma do tedawî bikerê, yan zî wayîrê înan bivejîyê. Êdî bes o."