Rojda Aydin

 

ŞIRNEX - Şaredarîya HDPyî ya Silopîyî ke dest bi xebata ramitişê dar û gulan kerda. Bi destê cinîyan xoza zindî bena. Sereka Mudûrîyetê Polîtîkayê Cinîyan ê şaredarî Nergîz Ant ke derheqê babete de qisey kerd û vat, do bi destê cinîyan şaristanê xo tewr weş bikerê.

 

Şaredarîya Partîya Demokratîke ya Şaran (HDP) ya qezaya Silopîyê Şirnexî, kar û xebatê xo hemverê pêro astengîyan bêmabên dewam kena. Şaredarîya Silopî ke serra vîyarte de 29 donim erdê şaredarî sebze ramitibî, emsar zî dest bi xebata ramitişî dar û gulan kerd. Sereka Mudurîyetê Polîtîqayê cinîyan ê şaredarî Nergîz Ant, derheqê xebata ramitişê dar û gulan de qisey kerd.

 

'Ma cinî reyke bîn xozaya xo gane bikerê'

 

Nergîze, dîyar kerd ke semedê xozaya Botanî her serre yena veşnayene û bêdar manena xemgîn benê û vat: "Cayêk sey Botanî ke hende herra ci dewlemend a ziwabîyayîş û kêmbîyayîşê zergûnî ma zaf xemgîn keno. Semedê nê zî emsar ma her ca, kuçe û parkê Silopî de ramitişê dar û gulan kerd. Ma refûjê rayîrê Îpekî darî ramitî. Darê ke ma ramitî zî darê ke vilan akeno û derûdorê rengîn kenê. Semedo ke kuçe û bajarê ma weşêr biaso ma nê darî ramitî. Xebatê ma dewam kenê û roniştişê qeza zî bi na xebate kêfweş ê. Wexto ke ma ramitişê dar û gulan kenê, zaf kelecan benê. Sewbîna na xebata ramitişê gulan zî qezaya ma de reya ewil o yeno kerdene. Ramitiş û ewnîyeyîşê gulan zî cinî kenê ma wazenê na xebate xo tewr pîl bikerê.

 

Nergîze dewam de win avat: "Hemverê betonî ma xozaya xo pawenê. Ma wazenê na xebate xo temamê şaristanî de vila bikerê û dewam bikerê ça cayê ke ziwa beno ma do tîya bi destê xo bi dar û gulan zergûn bikerê. Ma vat ke çira şaristan û qezayanê ma de zergûnî çinbî. La ganî ma sey tutanê xo xozaya xo ra biewnê. Ma bi şarê xo bawer ê ke do xozaya xo bipawê. La bi taybetî wexto ke ma vanê herre, cinî yen avîrê ma. Semedo ke cinî herre gane kena û xo vejena teber. Ma cinî bi destê xo xozaya xo gane bikerê."

 

'Ma wazenê na xebate xo hîra bikerê'

 

Nergîze, dewamê qiseykerdişê xo de wina vat: “Semedo ke ma na xebate xo dewam bikerê, lazimîyê ma bi şitlan estbi. Semedê nê zî taxa Kizîr erdek semedê şitlan visna. Uca de nika dar û şitlê gulan estê. Ma uca de gul û daran gênê û benê parkan de ramnenê. No tena gamêke qij o û ma do xebata xo hîra bikerê."

 

'Ganî ma zirar nêdê xozaya xo'

 

Nergîze, tewr peyîn qiseykerdişê xo de vat, ganî tu kes xozaya xo dûr nêkewo û wina vat: "Ganî ma zirar nêdê xozaya xo. Ma xozaya xo bi bi destê xo bipawê. Herra ma herrêka pîroz a û ganî ma zî wayîrrê na herra pîroz vejîyê."