MERKEZÊ XEBERAN - Muxabira ma Sema Çaglak bi xebera xo ya "Emîne Şenyaşar: Tena edalet eşkeno mi derman bikero" rûmetê Xelata Kede ya Şehîd Rojnameger Mazlûm Bagok ameye vînayene.

 

Bi wesîleyê serrgera Roja Rojnamegerîya Kurdî Yewîya Neqlkerdişê Azad ê Vakur û Rojhelatê Sûrîye de her serre xelata Kede ya Şehîd Rojnameger Mazlum Bagok dîyarîyê rojnamegeran keno. Par semedê vilabîyayîşê vîrusê koronayî merasîmê xelatdayîşî nêame organîzekerdene û name zî nêameyî dîyarkerdene. emsar zî bi eynî rewşe de komîteyê taqîbkerdişê xelate qerar da ke merasîmê xelatdayîş nêro kerdene. Coka emsar tena nameyê kesê ke xelate girewtê ameyî eşkerakerdene. Muxabira ma Sema Çaglak zî bi xebera xo, "Emîne Şenyaşar: Tena edalet eşkeno birînanê mi derman bikero" rûmetê xelate ameye vînayene.

 

Mazlum Bagok yewin rojnamegero ke Vakur û Rojhelatê Surîye de dinyaya xo bedilna, coka Kongreyê Yewîye Neqlkerdişî qerar girewt ke xelate bi nameyê ci bêro dayene. Mazlum Bagok yan zî bi nasnameyê Ehmed Saado serra 1992 de şaristanê Qamişlo de ameyo dinya û 28ê êlule, şerê YPGyî yê hemverê DAIŞî de Rebîaa de dinyaya xo bedilna.

 

Xelata Mazlum Bagokî serê hîrê sewîyeyan de yena vilakerdene: Xelatêke dinya, yanî rojnamegerê xerîbî ke Rojawan de kar kerdê yenê xelatkerdene. Xelata Kurdistanî, yanî rojnamegerê kurdî yê ke her çar parçeyê Kurdistanî de xebityenê yenê xelatkerdene. A bîn zî semedê rojnamegerê ke Rojawan de xebityenê de yen adayene.

 

Nameyê  rojnamegerê ke xelate girewtê wina yê;

 

Beşê Kurdistanî de xebere muxabira ma Sema Çaglak ke bi sernameyê, "Emîne Şenyaşar: Tena edalet eşkeno birînanê mi dermman bikero" rûmetê xelate ameye vînayene.

 

Xebera rojnamegere Rola Elxetîb ke televîzyonê Elerbiyî de xebityena "Tersê tutanê DAIŞî yê kampa Holê" rûmetê xelata dinya ameye vînayene.

 

Beşê dîmen de xebera rojnameger Ekrem Salih zî hîkayeya tutêko 10 serre ke maseyan serê rayîrî de roşeno û bi no hawa bîyo pî rûmetê xelate ame vînayene.

 

Beşê fotografî de hetê rojnameger Delîl Silêman ra ameyo antiş, rûmetê xelate ame vînayene. Fotografê leşkerêk Amerîkayij zîyanêke neftî de yo û bi rayîrê fotografî adir fekê ci ra vareno yeno vînayene. Delîl Silêman fotografkêşê ajansê AFPyî yo.

 

Beşê nuşteyî de xebera ke hetê Mihemed Hebeş ra derheqê bazirganîyê Narkotîkî de ajansê North Press de ameyo weşaneyene, rûmetê xelate ame vînayene. 

 

Sewbîna ame dîyarkerdene ke do Roja Radyoyê Dinya de xelatî bêrê vilakerdene.