STENBOL - Qezaya Esenlerî de Yildiz Gul,  qezaya Osmangazî de zî Akgul Yildiz netîceyê şîdetê camêrdan de ameyî qetilkerdene.

 

Qezaya Esenlerî ya Stenbolî de Yildiz Gul (38) meydanê şênkayî de hetê kes yan zî kesê ke nameyê înan nêdîyar de bi kardî hêriş ci rê ame kerdene.

 

Kes yan kesê ke hêriş Yildize rê kerdî, cayê serebûtî ra remayî. Yildize bi îmkananê xo şî meydan û derûdorî ra hetkarî waşte û dima ra şarî xebere dayî polîs û ekîbê weşîye. Ekîbê weşîye Yildiza ke bi giranî birîndar bîbî, berdî nêweşxane û Yildize nêweşxane de dinyaya xo bedilnaye. Goreyê zanayîşan semedê kes yan kesê ke hêriş kerdê bêrê tepiştene, hetê polîsan ra cigêrayîş ameyo destpêkerdene.

 

Bûrsa

 

Qezaya Osmangazî ke giredayê Bursayî yo Akgul Yildiz hetê Mehmet Yildizo ke qonaxê veradayîşî de bî, bi çek ameye qetilkerdene. Dimayê serebûtî  ekîbê weşîye ameyî û tespît kerdî ke Akgule dinyaya xo bedilnaye. Dozgerîyê Osmangazî semedê cigêrayîşî cenazeya Akgulê şawit Sazgehê Tibê Edlî yê Bûrsa. Mehmet Yildiz zî hetê polîsan ra ame destbendkerdene.