Rojda Aydin

 

ŞIRNEX - Bi ameyîşê wisarî dir, wextê ramitişî dest pêkerd. qezaya Hezexî de zî Rabîa Vesek hewşeyê keyeyê xo de dest bi ramitişî kerd  wina vat: "Wexto ke ez bi herre û xoza dir eleqeda bena, xeylêk kêfweş bena û pêro dejena xo xo vîr ra kena."

 

Bi ameyîşê wisarî dir çolî, koyî û xoza xo bi rengê vilikan dir xemilnayî û wextê ramitişî zî ame. Taxa Nû ya qezaya Hezexê Şirnexî de zî cinîyan bi ameyîşê wisarî dir dest bi ramitiş kerdî. Nê cinîyan ra yew zî Rabîa Vesek (65) ya ke taxa Nûye ra ya. Rabîa ke hewşeyê keyeyê xo de zebze ramnena, derheqê kar û barê xo de ma rê ercnayîş kerd.

 

Bi tutîtî ameya zewicnayene

 

Rabîa, dewa Bafî ya qezaya Hezexî ra ya û serrê 1990 de semedê zulmê dewlete verê xo dayê şaristan. Sewbîna hema tute bena yena zewicnayene. Nika 13 tutê Rabîa estê. Rabîa wina qal kerd: "Dewe de cuya mi her wext mîyanê xoza de derbaz bîne. La dimayê ke ez zewicyaya, cuyêka zor û zehmet bî para mi. Dimayê ke tutê mi virazyayî û dima ra mêrdeyê mi ame tepiştiş û mi bi tena sereyê xo tutê xo wey kerdî. Dewlete tu wext rehetî û weşî nêda ma. Dimayê ke ma dewa xo ra koç kerd cuya ma tewr zor û zehmet bî. Cuya ma verê zehmet bî labelê kêfweşî estbî. Ma karê erdan û ramitişî kerdêne."

 

'Eleqedarbîyayîşê bi herre û xoza mi kêfweş keno'

 

Rabîa vat ke bi 34 serrî yo ameyê Hezex û wina dewam kerd: "Ma tîya zî bi ramitiş dest bi cuya xo kerd. Ma Hezex de zî xo rê darê fêkî û zebze ramit. Ma her serre karê ramitişî kenê. Ma baxçeyê xo de hinar, gozî, încîr û tewir bi tewir fêkî ramnayene. Wexto ke ez ramitiş kena, ez xo zaf bi hizûr hîs kena. Ez wexto ke herre û xoza dir eleqedar bena, xeylêk kêfweş bena û pêro dejanê xo xo vîr ra kena."

 

'Xoza bi destê cinîyan zergûn bena'

 

Rabîa dewam de wina vat: "Bi taybetî ez wayîrê zebze û fêkî vejêna. Senîn ke merdim dergûşa xo wey keno, ez zî wina xoza dir eleqedar bena. Xoza bi destê cinîyan bena zergûn. Cinî her wext meraqê xoza kenê. Wexto ke cinî bibo, xoza zî esta. Ez hamnanî karê ramitişî kena, kergan wey kena û ver de zî nan pewjena. Zimistanî  zêde kar çin o. Ma hamnanî hîna zaf rincan benê. Sewbîna ma hewşê keyeyê xo de daran zî ramnenê."

 

Semedê birayê xo dare ramita

 

Rabîa, tewr peyîn vat, semedê birayê xo Hasan Cebadak ke 11ê Gulana 1984ine de Geliya Zawê de dinyaya xo bedilnayo, darêke încîran ramita û vat: "Cayê ke mi semedê birayê xo dare ramita, zêde darî nêbenê zergûn û êyê ke zergûn bibê zî fêkî nêgînê. La  birayê mi 37 serrî yo şehît kewto. La mi xo ra vat, ez do semedê birayê xo darêka încîran biramna û mi darêke serê nameyê ey de ramit. Bi 10 serrî yo mi na dare ramita û nika încîran zî gêna. Xeylêk zêde încîran gêna. Ma danê cîrananê xo û roşenê. Reyan zî semedê zimistanî wişk kenê."