Şehrîban Aslan

 

AMED - Serdozgerîya Komara ya Amedî falîyetê ke endama Heyetê Îdarekarîya Komeleya Cinîyan a Rosa avûkate Elîf Tîrenç Îpek Ulaş, kerdê suc hesibna û bi waştişê heta 12 serrî cezaya îdianame amade kerd. Elîfe vat: "Wexto ke merdim îdianame û muhakemekerdiş ra ewnîyeno, komela legal a la falîyetî îlegal yenê ramojnayîş.

 

Cipersayîşê ke Serdozgerîya Komara ya Amedî hemverê Komeleya Cinîyan a Rosa dabi destpêkerdene de 2020ine menga gulane de xeylêk cinî ameybî destbendkerdene û tepiştene. Yê ke ameyî tepiştene, bi ‘endamîya rêxistine’ ameyî muhakemekerdene û xeylê xo zî ceza ameyî dayene û tehlîyekerdene.

 

Elîf Tîrenç Îpek Ulaş ke yew awankerdoxa komele ya û avûkata komele ya ci rê cipersayîş ameyo akerdene. Serdozgerî derheqê Elîfe de  bi sebebê ‘endamîya rêxistine’ îdianame amade kerd. Sey endamê bînan yê komaleye, îdianameyê Elîfe zî bêbin o, kopya û pawekerdiş o.

 

Falîyetî suc ameyî hesibnayene

 

Şahida nimte ya bi nameyê ‘ZS35SN58UV52PG10" ke derheqê Elîfe de îfade daya, îdia kena ke Elîfe rêxistinê cinîyan de ca gêna û komeleyê cinîyan de falîyetan kena.

 

Elîfe îfadeyê ke derheqê îdiayê ke ameyê kerdene de wina vatibî: "Raşt o ez awankerdox û îdarekara aktîf ya Komeleya Rosaye ya. Ez îdiayê ke falîyetê rêxistinî yê semedê na komele qebul nêkena. Amancê na komele oyo ke şîdetê serê cinîyan de astenn bikero. Ez îfadeyê şahida nimte qebul nêkena. Sucê ke hemverê mi de yenê vatene, ez qebul nêkena."

 

5 serran ra heta 12 serran ceza

 

Dozgerî derheqê Elîfe de, netîceyê delîl û goşdarkerdişê şahidan de, çarçewaya falîyetê Komeleye de bi îdiayê ‘endamîya rêxistine’ ra 5 serran ra heta 12 serran waştişê ceza kerd.

 

Îdianame hetê 8. Dadgeha Cezaya Giran ya Amedî ra ameye qebulkerdene û yewin roniştiş do 3yê hezîrane de bêro vînayene.

 

Dozgerî: Komele bi tena sereyê xo esasê sucî ya

 

Elîfe derheqê îdianameyî de qisey kerd û vat: "Wexto ke ma komele awan kerd, ma rêzikname da wezaretê karê zereyî. Komeleya ma hema zemînê qanûnî de faliyetan kena. Serra vîyarte de serê îfadeyê şahida nimte de derheqê mi de cipersayîş ame kerdene. Falîyetê ma qal kerda. Dima ra ezî şîya mi îfade da û avûkatê mi ewnîyayî dosyaya mi ra. Tu esasêko sucî çin o. Avûkatî dozgerî ra pers kenê, dozgerî vano ke ‘Ez Komeleya Rosa bi tena sereyê xo esasê sucî vînena û no semedê mi bes o.' Dozgerî cewabêke wina dano."

 

'Tena îfadeyê şahîde nêeşkenê esas bigîrê'

 

Elîfe vat aye pawito ke derheqê dosya de qerarê bêtaqîbkerdşî bêr dayene la îdianame ameyo amade kerdene û vat: "Yewin delîl îfadeyê şahide yo. Komele legal a la falîyet îlegal ê. Ma tu kes semedê falîyet û çalakîyan nînê muhakemekerdene. Semedo ke ma binê banê komele de yenê muhakemekerdene. Yanî semedê cipersayîşêkê îfadeyê şahidan înan rê qîm keno. La dadgehe nêeşkena tena  îfadeyê şahide esas bigîra û ganî delîlê ke paştdayîş bidê ci bibê."

 

'Wazenê komele îlegalîze bikerê'

 

Elîfe tewr peyîn qiseykerdişê xo de dîyar kerd ke serra vîyarte de Amed de bi desan cinî ameyî tepiştene û vat: "Xeylê cinî pêwa ke endamê komele nêbî zî sey endamê komele ameyî hukmkerdene. Prosedurêke komele esto. Sîstemê ma de endamê ma dîyar ê. La her cinîyêke endam yena ramojnayîş. Bi nînan zî hewl danê ke komele îlegalîze bikerê."