RIHA - Merdima tepiştî Zahîne Erman derheqê grevan de qisey kerd û vat, hemverê tepişteyan binpaykerdişî zêde bîyê û vat: "Ez o her wext kîşte tepişteyan de bî. Têkoşînê înan, têkoşînê min o. Wa fek têkoşînê xo ra vera nêdê. Ez bawer kena do serbikewê."

 

Tepişteyê PKK û PAJKî ke bi amancê tecrîdê serê Rayberê PKKyî Abdullah Ocalanî bêro wedaritene û binpaykerdişê heqan yê zîndanan de peynî bibê, 27ê Teşrîna peyêne de kewtî grevê vêşanîye yê bêdem û bidor. Grev roja 144ine de dewam keno û tedayê îdarekarîyê zîndanî zî roj bi roje zêde beno.

 

Tepişteyo bi nameyê Baran Eman ke Zîndanê Tîpê F yê Hûmara 2yê Amedî de maneno. Baran 2015 de ke 16 serre bi, Nisêbîn de prosesê îdarekerdişê xoser de birîndar bi û dima ra ame tepiştiş. Barano ke ame tepiştiş, erşawitî Zîndanê Tîpê D yê Amedî. Baran ke 5 serrî yo tepişte yo, 5 mengî verê erşawitî zîndanê Tîpê F yê Hûmara 2yê Amedî.

 

Dayîka Baranî, Zahîne Eman derheqê binpaykerdişê heqan û grevê vêşanî de qisey kerde û reaksîyon vera tedayan da.

 

'Çîyo ke yeno kerdene zulm nîyo?'

 

Zahîde dîyar kerd ke lajê aye 16 serre Nisêbîn de birîndar ameyo destbendkerdene û vat: "Destbendkerdiş de îşkence ci rê kerdî. 5 serrî yo tepişte yo. Netîceyê muhakemekerdişê dadgehe de 55 serrî ceza dayî. Wexto ke lajê mi ame tepiştiş, qij bi. Îşkence kerdibî. Îşkence de çaqeyê ci şiknayî. Sewbîna hîrê cayê cîya de birîndar bi. Nika zîndanan de zulm û heqaret esto. Lajê mi wexto ke tewr peyîn geyra, vat ke gardîyanî erzenê serê koxuşan û semawerê çaya înan desteser kerdê. Baranî hîrê mengan kerdî koxuşa yew kesî. Gelo no zulm nîyo çîyo? Ma dayîkê kurdî se bikerê, ma zî bikewê grev."

 

'Wa her kes veng bido zîndanan'

 

Zahîde dewam de vat ke ganî her kes  veng bido zîndanan û vat: "Nika grev esto. Ne şewa ma şewa ne zî roje ma roj a. Ma tu xeyr dewlete ra nêdî. Yewin waştişê ma aştî, azadî û nasnameyê ma yo. Lajê mi no ser ame tepiştene. 2018ine de lajê mi 120 rojan grev de mend. Têkoşînê tepişteyan ê min o zî. Ez her wext verê înan de ya. Wa her kes veng bido vengê zîndanan."

 

'Wirzê ma zî bikewê grev'

 

Zahîde tewr peyîn wina vat: "Ganî ma çîyêke bikerê. Gardîyanî tepişteyan derb kenê. Tepişteyî rastê cigêrayîşê zitî yenê. Wirzê ma zî teber de bikewê grev. Hacetê tepişteyan desteser kenê. Mecbûr verdayê ke tepişteyî hacetê neweyan bigîrê. Hem keye û hem zî tepişteyan kerdê zehmetî."