Medya Uren 

 

MÊRDÎN - Mêrdîn de mabêne 3 mengan de 9 cinî ameyî qetilkerdene û 3 cinî zî ameyî birîndarkerdene. Sewbîna bi desan hedîseyê hêrişê desteştişî û hêrişê şîdetî yê serê cinîyan de çapemenî de cayê xo girewtê.

 

Her ke şino qirkerdiş û hêrişê desteştişî yê serê cinîyan zêde beno. Bi qerarê peyser antişê Pêkerdişê Stenbolî û pênêkerdişê mîyanê keyeyî de qirkerdiş û hêrişê desteştişî yê serê cinîyan tewr zêde benê. Bi taybetî polîtîkayê bêcezayî cesaret dano camêrdan. Semedê polîtîkayê dewlete hedîseyê desteştişî tewr zêde benê. Tena Mêrdîn de serê serre ra heta nika  9 cinî ameyî qetilkerdene û yan zî ver bi xokiştişî şinê. Xeylêk hêrişê desteştişî serê tutan de ameyî kerdene û xeylêk înan ra semedê hêrişê ensest bî ameyî nimtene.

 

Xeylêk serebûtî bi rayîrê zewacî serê înan padanê û hîn serebûtî zî hetê mamosteyê hîsgêran ra yenê eşnawitene. Tutî bêveng nêmanenê, têkilîyê înan, vurnayîşê cuya înan de virazîyenê, hedîseyê cuye qal kenê. Hemverê nê pîlê ke benê şîrikê suc û bêveng manenê estê. Reyan zî heta ke yew nê serebûtîyan ra resanê çapemenîye, bi serran nimte manneê.

 

Nameyê cinîyê ke mîyanê 3 mengan de ameyê qetilkerdene û şîdet înan rê ameyo kerdene wina yê:

 

*Dewa Sorisbahî ya qezeya Mîdyadî de Şehmus A. waşt ke cinîya birayê xo û 2 birazayê xo qetil bikero. Netîce de Esma A. (36) dinyaya xo bedilnaye, Faxrîye û T.A giran birîndar bî.

 

*Nisêbîn de Gulbahar Asabay (25) hetê birayê xo ra ameye qetilkerdene.

 

*Qoser de Emîne Gokçen (50) banyoyê xo de merde ameye vînayene. Bi hawayêke şikdar dinyaya xo bedilna.

 

*Mîdyad de S.G ya 32 serrî ke mektebe de xebityayîne, keyeyê xo de xo qeniqna û peynîya cuya xo ard. Bi hawayêke şikdar dinyaya xo bedilna.

 

*Qoser de semedê şerê mabêne di camêrdan de cinîya bi nameyê Sureya Demîr birîndar bî.

 

*Mêrdîn de Hava Cevheroglu semedo ke tuta aye verê sîneyê aye de fetisîya, peynîya cuya xo arde. Bi hawayêke şikdar dinyaya xo bedilna.

 

*Dewa Kertwênî ya Nisêbîn de Fîryel Şen (32) keyeyê xo dir ciwîyayîne, peynîya cuya xo arde. Bi hawayêke şikdar dinyaya xo bedilna.

 

*Mîdyad de Emîne Cersela 13 serrî, bi hawayêke şikdar dinyaya xo bedilna. Goreyê zanayîşê ke ameyî girewtene, Emîne semedê tehdîdê keyeyê xo peynîya cuya xo arda.

 

*Dêrik de şewa 8ê Adare de tutêka 17 serrî dimayê ke tecawuz ci rê ame kerdene, peynîya cuya xo arde.

 

*Nisêbîn de camêrdo bi nameyê Azîz A. desteşt tutêke. Dimayê ke tute çîyê ke ciwîyaya mamosteyê xo ra vat, serebût eşkera bi.

 

*Dêrik de polîso bi nameyê Y.Y waşt tecawuzê tutêke bikero.

 

*Qoser de mêrdeyo bi nameyê R.O desteştişê tuta xo ya 5 serrî kerd. Serê hewarê pîrika tute de R.O. şîdet û îşkence dayîke û tutan kerd.

 

*Osman Çuro ke tecawizê birakênaya xo Z. Ç. kerd, ame tehlîyekerdene û bi def û zûrna amebi pêşwazîkerdene.

 

*Ayşe Çeçen ke hetê çawişo pisporî ra desteştiş ci rê ame kerdene, hetê pî û dedanê xo ra amebî qetilkerdene. Dewaya aye ya qerarî 24ê Sibate de ame vînayene û kiştoxê Ayşe Çeçen serbest ameyî veradayene. Çawişo pispor zî nêame cezakerdene.

 

*Ercan Uysalero ke fûhûş serê cinîyan de ferz kerdêne, ame tehliyekerdene.