Rojda Aydin

 

ŞIRNEX - Gelîya Botanî ke bi ameyîşê wisarî dir bi vil û gulê ke abenê xemilya, bi weşikîya xo merdimî sermest kena.

 

Wexto ke merdim vano Botan bi herra xo ya pîroz û bi dewlemendîyê xoza xo ano vîrê merdimî. Coka zî bi ameyîşê wisarî dir Botano rengîn reyke bîn reng û weşikîya xo ramojna. Gelîya Botanî zî ke parçeyêke xozaya dewlemend a, bi ameyîşê wisarî dir bi weşikî û dewlemendîya xo merdimî mest kena. Vilî û gulê ke abîyê, gelî xemilnayê. Wexto ke merdim keweno gelîye, vengê çûçikan sey deyîra tewr weş yena goşê merdimî. Gelîye botanî ke her wisar û hamnanî kesê ke herême de yê înan rê bena wargehê seyranî. Emsar zî pêwa jan xeylêk kesan rê bena wareyê seyranî. Hetêke ra weşikîya gelîye zî koçerê ke zimistanî zozanan ra ameyê û gelîye de çadirê xo dayê ro.

 

Mîyanê dewlemendî de qesrêke

 

Sewbîna gelîya ke bi weşikîya xo bale ancena, berardişêko tarîxî yê kan Qesra Elo Dîno zî mîyanê xo de hewênena. Qesra Elo Dîno yew berardişê ke seserra 16ine de ameya viraştiş. Qesra qerajê Çemê Dîcle de, hîrêgoşeyê qezayê Cizîr, Basa, nêzdîyê dewa Bafî yê Hezexî de ca gêna. La qesra tarîxî semedê ke nîna pawitene, tena dêsê ci serê lingan de menda. Sewbîna rayîro ke şino qesre zî xeylêk tehluke yo. Zinarê ke ameyê kolnayîş, pêlik ameyê viraştiş û semedo ke merdim xo bi resno qesre keweno mîyanê raywanîya tarîxî. Gelîye Botanî bi weşikîya xo merdiman sermest kena û heyran verdana. Heto bîn ra qesra ke hetêke kewena Hezexî hetê şarî ra sey Berê Koyî yena bi name kerdene. Xêrcê qesre xeylê şikeftê tarîxî zî gelî de ca gênê.

 

Ma zî vanê kesê ke verê xo danê Botan, wa vernê de şêrê dewlemendî, xoza û weşikîya Gelîya Botanî bi çimanê xo bivînê.