Sema Çaglak

 

AMED - Bi grevê vêşanîye hemverê tepişteyan teda tewr zêde bî û merdimê tepişteyan zî rewşa bîyaye bi endîşeyîn o. Keyeyê ke tutanê înan ameyê surgunkerdiş dîyar kerdî ke tepişteyî bi îşkenceyan dir rî bi rî manenê û vatî: "Ganî vengê tepişteyan û merdiman bêro eşnawitene."

 

Tepişteyê sîyasî yê zîndanê Tirkîya û herême 27ê Teşrîna Peyêne 2020 de, hemverê tecrîdê girankerde serê Rayberê PKKyî Abdullah Ocalanî û binpaykerdişê heqê tepişteyan dest bi grevê vêşanîye yê bêdem û bidor kerdî. Grev 139 rojî yo dewam keno. Pêwa nê çîyan bi grevê vêşanîye teda û îşkenceyê serê tepişteyan zî zêde benê. Tepişteyî bi rayîrê telefonî teda û îşkenceyê ke serê nînan de yenê kerdene neql kerdî merdimê xo û vengdayîşê ayabîyayîşî kenê. Nînan ra yew zî keyeyê Çîçek û keyeyê Oralî yo.

 

'Tepişteyî bi îşkenceyî dir rî bi rî manenê'

 

Kenan Çîçek 5 serrî yo Zîndanê Tîpê F yê Kirikaleyî, Ferhat Çîçek bi 5 serrî yo û Beşîr Çîçek zî bi serrêke Zîndanê Tîpê D yê Amedî de tepişte yê. Her 3 tutê ke merdimê Çîçekî çalakîya grevê vêşanîye de ca girewtib. Dayîka Kenan, Ferhat û Beşîr Kastama Çîçek dîyar kerd ke tepişteyî bi zulmêk pîl dir rî bi rî yê.

 

'Hemverê tepişteyan de tecrîdêk pîl esto'

 

Kastama, dîyar kerd ke dimayê grevê vêşanîye tepişteyî tewr zêde binê zulmî de yê û vat: "Lajê mi Ferhat bi rayîrê telefonî behsê rewşa xo kerd. Goreyê zanayîşê lajê mi gardiyanî tewr tay di rojan reyke bi serê kaguşan gênê û heqeretê tepişteyan kenê. Di embazê înan bi îşkenceyî dir rî bi rî mendê, kuwayîş werdê û înan kerdê hucre. Wexto ke tepişteyî surgunê Tîpê Fyî kerdî, nêverdayî ke firaq û cilê xo kom bikerê û berdê zîndanê newe. Nêverdayî ke xo rê koçike çay zî bigîrê. Şûşeyê înan yê çay zî çin o. Heme çîyê înan bi sînor kerdê. Yanî tecrîdêko pîl serê înan de esto. Sewbîna gardîyanî zî tepişteyan ra vanê, 'Şima do îteat bikerê.' Sewbîna tepişteyê ke beşdarê grevê vêşanîye bîyê bi taybetî bi zulm û tedayî dir rî bi rî manenê. Tepişteyê ke hemverê tedayan vejênê zî tewr zêde bi serê înan de şênê. Lajê mi waşt ke ez ê binpaykerdişî raya umumî rê neql bikerî."

 

'Cayê ke huqûq çinîbo tîya cuye zî çin a'

 

Kastama dewam de vat, cayê ke huqûq çinîbo tîya cuya zî çin a û wina vat: "Xêrcê di lajê mi yê Amed de tepişteyê, lajê mi Kenan zî Kirikkaleyî de tepişte yo. Kenan zî bi eynî tedayan û zordarîyan dir rî bi rî maneno. Ma çend rey waştişname da ke wa bîyarê zîndanêke nêzdî, la semedo ke kewto grevê vêşanîye waştişname nêame qebûlkerdene."

 

'Ganî vengê tepişteyan û keyeyan bêro eşnawitiş'

 

Dayîka Vedat Oral ke 5 serrî yo tepişteyî Belkise Oral zî wina bale ant serê tedayan û vat: "Lajê mi Vedat demêk derg o Zîndanê Tîpê Dyê Amedî de tepişte yo. Ey zî surgûnê Tîpa Fyê Amedî kerdî. Nêweşîyê lajê mi estê. Wextê ke ameyê surgunkerdiş bi hêrişan dir rî bi rî mendê. Lajê mi bi rayîrê telefonî neql kerd ke gardîyanî bi sebebê cîya bi serê koguşan de gênê û zulmêko pîl hemverê tepişteyan kenê."

 

Belkise, dîyar kerd ke ganî vengê tepişteyan û vengê keyeyê tepişteyan bêro eşnawitiş, wa zulm û zordarî werte ra wedarîyo.