ENQERE - Endamê Dayîkê Aştîye yê Enqere semedê grevê vêşanîye vengdayîşê hîsgêrî kerdî û vatî: "Ganî waştişê tepişteyan bêrê qebulkerdene. Sewbîna semedê çareserîyê probleman zî ganî dîyalog bêro averbîyayîş."

 

22 serrî yo hemverê Rayberê PKKyî Abdullah Ocalanî tecrîdêko giran esto. Hemverê tecrîd û binpaykerdişê heqê tepişteyan 27ê Teşrîna Peyêne 2020 de zîndanê herême û Tirkîya grevê vêşanîye ame destpêkerdene. Grev 139 rojî yo dewam keno. Wargehê Multecîyan ê Şehîd Rustem Cûdî (Mexmûrê) bi rayberîya Meclîsê Îştarî grevê vêşanîye ame destpêkerdene û 118 rojî yo çalakî dewam kena. Wargehê Multecîyan ê Lavrîo yê Yewnanistanî de zî 100 rojî yo grevê vêşanîye dewam keno. Derheqê babete de Endama Dayîkê Aştîye ya Enqerî ra Kadrîye Ozgan û Hatîce Ay ajansê ma rê qisey kerdî.

 

'Gelo do zulm heta key dewam bikero'

 

Kadrîye Ozgan, destpêkê qiseykerdişê xo de bale ant serê tecrîdî û vat: "Tecrîd bi tu hawayî nîno qebulkerdene. Dewlete qet Homayî ra nêtersena? Ne avûkatî û ne zî keyeyî eşkenê bi Abdullah Ocalanî dir pêvînayîş bikerê. Bi seyan tepişteyî nika grev de yê. Tecrîd zulm o û hemverê şarê Kurdî zulm kenê. Gelo no zulm do heta key dewam bikero. Sebebê tecrîdî çi yo? Eke tecrîd hemverê rayberê ma wirzo do tecrîd hemverê şarê Kurdî zî wirzo."

 

'Wa avûkatî şêrê Îmraliyî'

 

Kadrîye, dîyar kerd ke pêvînayîşê bi Abdullah Ocalanî dir bêro kerdene girîng o û wina vat: "25ê Adare de bi rayîrê telefonî rayberê ma birayê xo dir pêvînayîş kerd, la pêvînayîş ame birnayene. No çî bi tu hawayî nîno qebulkerdene. Çim û goşê ma Îmraliyî yo. Ma bendeyê vatişê ey yê, her vatişê ey hêvîyêke dano ma. Ma wazenê avûkatî şêrê Îmralî û zanayîşêke bîyarê. Ma rewşa rayberê xo ra bi endîşeyîn ê."

 

'Dinya hemverê tecrîdî bêveng a'

 

Kadrîye, dîyar kerd ke dinya heme vera tecrîdî bêveng a û vat: "Bêvengîya dinya nîna qebulkerdene. Ewro roja wayîrvejîyayîşî ya. Îqtîdar heq û statuyê kurdan ra terseno. Semedê nê zî hemverê şarî de şerêke dayo destpêkerdene. Hedef girewtişê Rojawan zî parçeyêke tecrîdî yo. Semedo ke kurdî bi hêz ê, îqtîdar coka hende hemverê kurdan vejîyo. Êdî hêzê AKPyî nêmendo. Ma êdî nêwazenê zerrîya dayîkan biveşo. Ganî ma wayîrê tepişteyanê xo vejîyê."

 

'Goş bidê waştişê tepişteyan'

 

Hatîce Ay zî dîyar kerd ke seba azadîya Abdullah Ocalanî ganî têkoşînêk bêro dayene û vat: "Abdullah Ocalan Rayberê Şarê Kurdî yo. Tecrîd bi tu hawayî nîno qebulkerdene. Bi taybetî rayberê ma zî hemverê şer û kiştişî vejêno. Semedê nê zî ganî ma semedê rayberê xo têkoşînêk bidê."

 

Hatîce, tewr peyîn wina vat: "Ma sey Dayîkê Aştîye edalet, têduştî û aştîye wazenê. Sey her wext îqtîdar goş nêdano waştişanê ma. La ma do zî sey her wext têkoşînê xo dewam bikerê. Eke dewlete wazena çîyêke bikero, ganî goş bido waştişê tepişteyan. Sewbîna ganî rayîrê dîyalogî bêro akerdene."