Safîye Alagaş

 

STENBOL - Cinîyan dîyar kerdî ke emsar manayêke cîya ya Newroze esta û wina vatî: "Ma adirê Newroze berz kenê. Ma heme kuçeyan de vengê xo berz bikerî. Ma pey îradeyê Leyla Guvene de yê. Waştişê ma ya Newroza emsar azadîya Abdullah Ocalanî ya."

 

Çalakîya Grevê vêşanîye ya hemsereka KCDyî û parlamentera HDPî ya Colemêrgî Leyla Guvene ke bi amancê wedartişê tecrîdê Rayberê PKKyî Abdullah Ocalanî ser dabî destpêkerdene roja 132in de dewam kena. Cinîyê ke seba Newroze xo amade kenê zî dîyar kerdî ke wareyan de bibê vengê Leyla Guvene û vatî do serkewtiş ê înan bibo.

 

'Newroze xoverdayîş a'

 

Cinîya bi nameyê Kumrî Çelîke arde ziwan ke Newroze roşanê Cuye ya şarê Kurdan a û tu şar bi qasê Kurdan xoverdayîşêke bi heybet ranêmojnayê û wina va: "Newroze seba kurdan rojêke zaf girîng a. Newroze seba ma yena manaya xoverdayîş î. Dişminê ma zalim o. Merdimayî nêzano. Eke bizanayne hende zulm bi merdiman rê nêkerdêne. Kurdî seba heqê xo têkoşîn kenê. Ez Leyla û heme xoverdayoxan selam kena. Heta peynîya dilope peynîya gonîya xo ma do têkoşîn bikerê. Ma taqîbkerdoxê îradeyê înan ê. Ma serkewtişê înan rê bawer ê."

 

'Ma adirê Newroze weş bikerê'

 

Cinîya bi nameyê Turkan Sumbule zî da zanayîş ke 8ê Adare heta Newroze xeta xoverdayîşê gerek bêro awankerdene û va: "Ganî şar vera tecrîdî vinderê û bibê vengê xoverdayîşê zindanan. Newroze xoverdayîşêke pîl a. Ganî ma wayîrê xoverdayîşê tarîxî vejîyê. Ma adirê Newroze weş bikerê. Ma kuçeyan de vengê xo berz bikerê. Seba ke ma xoverdayoxan û Ocalanî rê selam bieşrawê ganî ma vejîyê kuçeyan.

 

Cinîya bi nameyê Necla Çetîne zî bale ante serê girîngîyê Newroza emsar û wina va: "Ma cuyake azad wazenê. Ma binê tedayan de yê. Ma bi nasnameyê xo, xo îfade kenê. Belê do teda do bibê, la ganî ma vera nê vejîyê. Ma xo ver bidê, do dinya vengê ma bieşnawa. Do tecrîd peynî bibo û waştişî bi ca bêrê."

 

Besra Sumbule zî arde ziwan ke waştişê înan o yo ke Newroza emsar de Abdullah Ocalanî azad bivînê û va: "Ma do Ocalan mîyanê xo de bivînê. Ma do faşîzm bişiknê. Ma şar ê. Kok, ziwan û kulturê ma cîya yo. Serkewtiş do ê ma bo."