WAN - Hûmara domanê ke yenê xebitnayîş resa 2 mîlyon û seba krîzê ekonomî na hûmare her ke şina zêde bena. Erdîş de her dikan, bazar û kuçeyê ke domanî xebityenê, yenê vînayene.

 

Goreyê dayeyê serra 2016an Sazgehê Îstatîstîkê Tirkîya (TUÎK) hûmara kesê teberê qeydî de xebityenê sera 78 yo. Hûmara domanê ke xebityenê serra 2012an 601 hezar bî û 2016an de zî resa 709 hezar. Her 10 domanan ra 8ê xo teberê qeydî de xebityenê.

 

Serra 2018an de 3 domanê ke emrê înan 15, 16 û 17 bi cînayetê karî de cuya xo vindî kerdî.Verê înan de serra peynî de seba krîzê ekonomî domanî tewr zêde tesîr bî. Erdîşê Wanî de xeylê domanî bazaran, sanayî, loqanteyan de xebityenê tewrê xo zî şekir, destmale û awe roşenê.

 

'Destê ma cemidyenê'

 

Wendekarê sinifa 3îne M.A yo 9 serre dîyar keno ke seba hetkarîya pîyê xo şino bazarê taxe û va: "Peynîya hewteyî û wexto ke wendegeh ra vejîyî zî şina serê tezgahê pîyê xo. Hewa zaf serdin o. Ez 9 serrî ya. La seba ke pere çin o, ez û waya xo şinê verê pîyê xo. Ma bazar de awan kenê û wedarnenê. Xeylê rayan ma kewenê tarîtî zî. Wexto ke ma xebityenê destê ma cemidyenê. Ma mecbur ê piştdayîş bidê pîyê xo."

 

Fek wendegeh ra vera da û dest bi xebate kerd

 

U.A yo 14 serre zî ard ziwan ke seba problemê ekonomî fek wendegeh ra vera da yo û sanayî de xebityeno. U.A da zanayîş ke o nika verê destê westa de xebityeno û va keyeyî vato ti do tîya xo tewr baş xo aver berê.

 

Şaîze Gulere zî da zanayîş ke seba krîzê ekonomî nêeşkenê debara xo bikerê û va: "Ez seba lajê xo kar geyrena ke hamnanî bixebityo. Ma 6 nifûs ê. Ma şinê bazar ma nêeşkenê çîyêke bigîrê. 5  domanê mi wanenê. Cu sey verî nîya. Kes nêeşkeno çîyêke bigîro. Ez nika ra seba lajê xo kar geyrena."