DÊRSIM - Qezaya Qisle ya Dêrsimî de afîşê ‘Yê Mao’ yê HDPyî ‘bifikar’ ame vînayene. Polîsan afîş sey siloganê ‘Maovan’ dîyî û waştî ke afîşî bêrî arêdayene

 

Xeylê bajar û qezayan de pankart û afîşê Partîya Demokratîke ya Şaran (HDP) yê bi kurdî ke seba weçînitişê herêmî ameyî hadrekerdene ameyî aliqnayene û derheqê înan de qerarê arêdayîşî yeno dayene. Badê xeylê qeza û bajaran nika zî qezaya Qisle ya Dêrsimî de afîşo ke ser de kirmanckî ‘Yê Mao’ yê HDPyî nuştebî ‘bifikarin’ ame dîyayene û tehqîqatêko ecêbin ame destpêkerdene.

 

Çekuya ‘Mao’ ke serê afşî de nuştebîye ‘bifikarin’ ame dîyayene. Polîsan selahîyetdarê buroya weçînitişî yê Yewîya Hêzê Şorişgeran yê Qisle vendayî mudirîya polîsan û manaya tîpa ‘o’ înan ra persayî. Xebatkarê HDPyî zî înan rê manaya siloganî vatî.

 

Polîsî siloganê ‘Yê Mao’ sey çekuya ‘Maovan’ ercnayî. Merkezê Dêrsimî de seba na çekuye tehqîqat ame destpêkerdene. Polîsan qezaya Qisle de waştî ke afîşê ‘Yê Mao’ bêrî arêdayene.