MERKEZÊ XEBERAN - RJAKî mektubêk erşawit Leyla Guvene rê. Mektube de wina ame vatene: “Cesaretê to hêz û moral dano ma cinîyanê Başûrê Kurdistanî. Ti bîya vengê bengînîya azadîye ya cinîyan. Xoverdayîşê to hêz û moral dano ma.”

 

Rêxistinê Cinîya Azade ya Kurdistanî (RJAK) seba hemsereka KCDyî û parlamentera HDPyî ya Colemêrgî Leyla Guvene ya ke 128 rojî yo vera tecrdîkerdişê Rayberê PKKyî Abdullah Ocalanî grevê vêşanîye de ya rê mektubêk erşawite. Mektub de ame vetene ke, xoverdayoxê vera hêzanê şerî nîşanê îrade, bawerî, heskerdiş û serkewtişî yê.

 

RJAKî destpêkê mesajê xo de wina va: "Wareyê Leyla Qasiman û Leyla Waliyan ra silam wareyê Leyla Guvenan rê. Şexsê şima de hem xoverdayoxê grevê vêşanîye yê zîndanan, welatî û teberê welatî de xo ver ro danê silam kenê."

 

'Cesaretê şima moral û hêz dano'

 

RJAKî dewamê mesajê xo de wina vatî: "Ti bîya rastîya serewedaritişî, ziwan û vengê  cinîyan ê ke heqê ci ameyo binpaykerdene. Cesaretê şima yo sey okyanûsan o bê peynî, hêz û morol dano ma cinîyanê Başûrê Kurdistanî. Qehremanî  yê kesê ke ruhê demî baş vînenê û tarîx nusenê. Teyna ê benê ziwanê heskerdişî, hêvîye û hesreta vîndîbîyayîye.  Seba naye zî, heqê qehremanan o yo ke bibê ziman, veng, qîrayîş, çalakîye û serkewtişê cimatî. Ti ewro bîya rastîya serewedaritişî, ziwan, nasname, veng û nameyê cinîyan."

 

'Hêzê îradeyê fîneno zereyê zaliman'

 

RJAKî tewr peyîn zî wina va: "Hêzê îradeyê ti ters fîneno zereyê zaliman, kelecan dano mezlûman. Ti bîya sentezê qehremanîya serê nê heme erdan û bi nê rengî zerrî û hişî neqişnayî. Ma cinîyê RJAK'î îfadeyê to yê wayîrê îradeyî yo ke nîşanê bengînîya azadîye yo, teqîp kenê. Resimo ke to xêz kena, deyîra ke ti vana, vengê ma hemeyan o. Ti bîya name, veng û çalakîya azadîye ya heme cinîyan. Ti do sey cinîyêka evîndare û pîroze têkoşîn û zerrîya ma de tim biba. Ma soz danê ke bi rengê Leyla biciwîyê, têkoşîn bikerê û ser bikewê.”