Rojda Aydin

 

MÊRDÎN - Gurbet Ektîrena ke 15ê Çele de Zindanê Bakirkoyî ê Cinîyan de dest bi grevê vêşanîye kerde, dimayê ke zindan ra serbest amî veradayîş, 8ê Adare ra çalakîya xo keye de dewam kena. Gurbete arde ziwan ke çi keye de çi zindan de çalakîya înan dewam kena û wina va: "Ganî komel bêveng nêmano. Eke bêvengî dewam bikera do bibo sebebê merdişî. Na bêvengî ma dejnena û tena şar eşkeno peynîya bêvengîye bîyaro."

 

Çalakîya grevê vêşanîye 

 

Gurbet Ektîrena 15ê Çele de Zindanê Cinîyan ê Bakirkoyî de vera tecrîdê Rayberê PKKyî Abdullah Ocalanî ser o dest bi grevê vêşanîye bêdem û bêagerayîş kerde. 8ê Adare de roniştişê dewaya xo ya amî vînayene de amî veradayene. Gurbete ke dimayê serbest amî veradeyene çalakîya xo ya grevê vêşanîye keyeyê xo yê Dêrîkê Mêrdînî de dewam kena. Gurbete wextê qedexeyê tebervejîyayîşê kuçeyan serra 2015an de ame îlankerdene de bi îdîayê “Endamîya rêxistine' amî tepiştiş. Gurbete, roja ke dest bi grev kerda 3 kîlo daya û nika odaya seba aye ameya amadekerdiş de manena. Keyeyê Gurbete aye dir eleqedar beno. Gurbeta ke dimayê serbest amî veradayîş nêşî nêweşxane, do doktorê xoser ê Yewîya Doktorê Tirkan (TTB), rewşa weşîye aye taqîb bikerê. Gurbete derheqê çalakîya xo ya vera tecrîdî daya destpêkerdiş de qisey kerde.

 

'Amancê mi wedartişê tecrîdî yo'

 

Gurbeta ke 58 rojî ya grevê vêşanîye bêdem û bêagerayîş de ya arde ziwan ke amancê aye wedartişê tecrîdê Rayberê PKKyî Abdullah Ocalanî ser o yeno kerdene yo û wina va: "Heta ke tecrîd serê Serek ra nêro wedartiş do çalakîya m adewam bikero. Çi bedel beno wa bibo heta tecrîdo ke Serek ser o yeno kerdene nêwedarîyo na çalakîye zî do dewam bikero. Ez zindanê Bakirkoyî de 6 aşman menda. O wext 4 embazê ma 86 roj bî ke dest bi grevê vêşanîye kerdî. Dimayê aşmêke bîn, ma di embazê bîn beşdarê na çalakîye bî. Çalakîya ma zî 57 rojî yo dewam kena. Eynî wextî de zindanê Bakirkoyî de di qawişan de pêroyî 56 embazê cinî estê. Ez exto ke zindan de bîya, amancê ma embazan o bi ke tecrîd bêro wedartiş. La hetêke ra zî şarê ma zaf bêveng o. Ma waştêne ke şarê ma vengê xo berz bikero."

 

'Ez do çalakîya xo dewam bikerê' 

 

Gurbete, da zanayîş ke çalakîya daya destpêkerdiş de çi zindan çi keye de nêvuryaya û wina va: "Çalakîya xo ez ewro teber de dewam kena û seba mi tu çîyêke nêvuryayo. Seba ke ma wexto ke zindan de bî, amancê ma çi bi teber de zî eynî amanco. Îqtîdar ewro bi zanayîş mi tehlîye kerd. Seba ke zanayne ez do fek çalakî ra vera nêdî. La ez ewro ameya tehlîyekerdene û çalakîya xo zî bi eynî amancî dewam kena. Ez do heta peynî zî dewam bikerî."

 

'No tecrîd se beno wa bibo ganî bêro wedartiş'

 

Gurbete dewamê qalîkerdişê xo de wina va: "Çalakîya ke Leyla Guvene daya destpêkerdene, bi rastî zî çalakîyêke zaf girîng a. Çalakîya ke Leyla Guvene daya destpêkerdiş tarîx nusnena. Hetêke ra zî ganî ma rexnedayene xo bidê. Ganî na çalakîye ma verê bidayne destpêkerdene. Leyla bi çalakîya ke daya destpêkerdene tarîx nusnena. Sey yeno zanayene 1ê Adare de heme zindanan de bi seyan hepsî dest bi çalakîya vêşanîye kerdî. Her çiqas zor û tedayê dewlete bibê zî do no tecrîd peynî bibo. Ma qerarê xo dayo û ma do qerarê xo ra fek vera nêdê. Ewro roja bêvengîye nîya."

 

'Bêvengîya ke dewam kena do bibo sebebê merdişan'

 

Gurbete tewr peynî veng da ke heme şarê Kurd seba na çalakîye ameya destpêkerdene veng vejê û wina va: "Ganî êdî şarê ma seba na çalakîye wirzê serê lingan. Eke na bêvengîye wina dewam bikero, do bibo sebebebê merdişan. Na bêvengîye ma dejnena. Gerek êdî şarê ma tersê dişminî xo ser o bierzê. Şarê ma ewro hende çîyan vîneno senîn bêveng maneno? Heta Serek azad nêbo do çalakîya ma zî dewam bikero. Waştişê embazanê ma yê zindanan zî no yo. Ma bawer kenê ke ma do biresê amancê xo. Leyla Guvena ke 127 rojî yo grevê vêşanîye de ya hetê medyaya îqtîdarî ra nêameya vînayene û tu xebere derheqê çalakîya aye de derbaz nêbena. Ewro ters înan ser o esto û nêzanê se bikerê. Ez bawer a ke ma do pîya serkewte bibê."