Xoverdayîşê Leyla Guvene roja 125in de yo

  • 14:14 12 Adare 2019
  • NAROJANE
AMED - Xoverdayîşê grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 125ine de dewam keno. Sewbîna çalakîyê grevê vêşanîye ke zindanan û cayanê cîya-cîyayan de seba eynî waştişan dest pêkerdbî zî bi qerardarî dewam kenî.   
 
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 1245in de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena.  
 
Girawe Îmralî de pêvînayîş 
 
12ê Çeleyî de çalakîya Leylaya ke grevê vêşanîye dewamkerdêne de birayê Abdullah Ocalan Mehmet Ocalan şi Îmralî û bi birayê xo dir pêvînayîş kerd. Leylaya ke o wext bi rayîrê avûkatanê xo dir derheqê babete de îzahat da û wina va: "Ceribnayîşê ma yê verê zî estê. Serra 2016an de koma ke ez zî tede ma 50 kesî vera tecrîdî teber de çalakîya grev dayî destpêkerdiş. AKPî o wext zî Mehmet Ocalanî seba bi Abdullah Ocalanî dir pêvînayîş bikero eşrawit Îmralî û bi mesajê ke birêz Ocalan ame çalakî amebî peynîkerdene. La tecrîd dewam keno. Nika zî eynî metod yeno kerdene. Birêz Ocalan rayberêke polîtîk o. Seba keyeyê xo girawe de nîyo. Sey hepsîyê bînan heqê ey ê pêvînayîşî esto.
 
Leyla Guven: Waştişê ma meşrû yê  
 
Waştişê ma sere de zelal ê. Ma vanê tecrîd sucê merdimayî yo bêro wedartiş û birêz Ocalan bi avûkatan û keyeyê xo dir pêvînayîş bikero û bi heyetê xerîban dir bêro têhet. Coka ma çalakîya xo bi pêvînayîşêke bi peynî nêkenê. Waştişê ma vera qanûnî nîyê waştişê ma meşrû yê. Eke amancê AKP - MHPyî bedeldayîşê ma yo ma bedeldayîşî rê zî amade yê. Ma nê tifaqê faşîst ra vanê eke tabûtî zindanan ra vejîyê şima do nêeşkê cayê xo de binişnê ro."   
 
Çalakîya hepsîyan dewam kena   
 
Dimayê Leylaye Mintiqaya Federalê Kurdistanî çalakîya Temsîlkarê HDPyî Nasir Yagizî roja 112an de, Strasbourg de 14 kes û Gallerî de Îmam Şîş roja 86ine de yê. Hepsîyê ke 16ê Çele de çalakî dest pêkerdî roja 87yan de dewam kenê. Heto bîn ra çalakîya hepsîyê PKKyî û PAJKî ke 1 Adare de dest pêkerdî roja 12an de dewam kenê.  
 
Operasyonê vera çalakîya grevê vêşanîye ya HDPyiyan
 
Bi talîmatê Suleyman Soylu 5 çalakgerê ke grevê vêşanîye de ameyî tepiştiş. Endamê HDPyî Salih Cansever, Îsmet Yildiz, Sevican Yaşar, Salih Tekin û Bilal Ozgezer 4 roj dima ra serbest ameyî veradayîş. Çalakgerê ke serbest ameyî veradayîş, çalakiya vêşanîye dewam kenê.
 
Heto bîn ra Parlamenterê Wanî Tayyip Temel, Murat Sarisaç, A. Halik Kurt, Yusuf Ataş bi sloganê "Do serewedartiş bireso amancê xo. Bicuyo serewedartişê Leyla" dest bi grevê vêşanî kerd. Dimayê îzahatê ke ame dayîş awanîya HDPyî bajar ame dorpêçkerdiş û saetê şanî de hêriş ame kerdiş. Netîceyê hêrişo ke ame kerdiş de Bîlal Ozgezer, Abdulhalik Kurt û Yusuf Ataş, Salîhî Îsmet, Sevîcan û Salîh Tekîn reyna ameyî tepiştiş.
 
Sabîha Temîzkan:  Hîna rayîrê ma zaf esto 
 
Kênaya Leylaye rojnameger Sabîha Temîzkane zî 125 roj şahidê çalakîya dayîka xo rê kena. Sabîha ser hesabê xo yê komelî de wina va: "Ma hewl danê ke pîya bişewrîyê. Ma her di zî beno ke xo ra vanê wa xemgîn nêbo. Werrekna biqediyayne û ma tewr zêde yewbînan ko bikerdêne. Ti do vajê dayê! Hadê destê mi bigîre, hîna rayîrê ma ke ma şêrê zaf o."